Chinese vissersboot onderskep

Die Namibiese vloot het ’n buitelandse vissersvaartuig vasgetrek wat na bewering by onwettige visvangbedrywighede in Namibië se territoriale waters naby die Angolese grens betrokke was. 

Die woordvoerder van die Namibiese weermag, kolonel Petrus Shilumbu, het Dinsdag in ’n mediaverklaring bevestig dat die Namibiese vloot se vlagskip, die NS Elephant, die vissersboot FU YUAN YU 9878 Sondag tydens ’n roetinepatrollie in die noordelike maritieme grensgebied onderskep en vasgetrek het. Die boot is geregistreer om onder die Chinese vlag te vaar en word as ’n vissersvaartuig geklassifiseer. 

“Die verdagte vaartuig is suksesvol om 10:40 by die koördinate 17°14.98’ S en 011°32.42’ O onderskep. Dit het binne Namibië se aaneenlopende sone of territoriale waters plaasgevind, spesifiek binne die 24/12 seemyl-grens van ons jurisdiksie,” het Shilumbu verduidelik. 

Hy het verder verduidelik dat die vaartuig ten tyde van die onderskepping na bewering by onwettige, ongerapporteerde en ongereguleerde (IUU) visvangaktiwiteite betrokke was en sonder ’n geldige vangspermit of kwotatoekenning bedryf is. 

“Tydens die daaropvolgende inspeksie het vissery-inspekteurs aan boord die afwesigheid van ’n geldige vangspermit of kwotatoekenning bevestig.

“Die inspeksie het ook verskeie bykomende oortredings aan die lig gebring. Die vaartuig was aktief besig met onwettige oes binne ’n beperkte sone en is gevind met ’n vol net van ongerapporteerde visspesies.” 

Shilumbu het gesê dokumentêre oortredings het ook ingesluit dat die kaptein nie ’n geldige lisensie kon toon nie. 

Owerhede het verder beweer dat die vaartuig se outomatiese identifikasiestelsel (AIS) doelbewus gedeaktiveer is voor die onderskepping. 

Die bemanning bestaan uit 22 mans – vier Chinese en 18 Angolese burgers. Na verwagting sal die verdagtes op verskeie aanklagte in die landdroshof op Walvisbaai verskyn. 

“Die vastrek van hierdie vissersvaartuig toon onomwonde die streng handhawingsprotokolle wat ingestel is om Namibië se mariene hulpbronne in samewerking met alle relevante belanghebbendes te beskerm. 

“Die Namibiese vloot is daartoe verbind om alle maritieme oortreders van die wet vas te trek,” het Shilumbu gemaan. 

Ondersoeke duur voort voordat aanklagte amptelik teen die beskuldigde persone aanhangig gemaak word.

– [email protected]