Byna 12 000 bedrogsake in drie jaar

Altesaam 11 990 bedrogsake is tussen April 2022 en April 2025 aanhangig gemaak, terwyl 9 039 crimen injuria-sake na bewering landswyd via aanlyn platforms gepleeg is.Gedurende dieselfde tydperk is 4 835 voorvalle van laster en 165 voorvalle van diefstal onder valse voorwendsel aangemeld. Daarbenewens is ses voorvalle van aanranding deur dreigemente en twee voorvalle van afpersing ook oor die afgelope drie jaar aangeteken.Die hoof van die Namibiese polisie (Nampol), inspekteur-generaal Joseph Shikongo, het dié syfers gister in Windhoek tydens die amptelike bekendstelling van die veldtog vir die etiese gebruik van sosiale media onthul.“Die Namibiese polisie het ’n toenemende aantal strafsake aangeteken wat deur sosialemediaplatforms gepleeg of gefasiliteer word. Van die algemeenste misdade sluit in bedrog, crimen injuria, laster, diefstal onder valse voorwendsel, aanranding deur dreigemente, afpersing en mensehandel,” het hy gesê.Tussen April 2022 en April 2025 het die polisie ook ses voorvalle van mensehandel aangeteken. “Hierdie voorvalle behels 38 Namibiese slagoffers wat via ’n aanlyn platform gewerf is om buite die land te werk, 50 Namibiese slagoffers wat gewerf is om binne die land te werk en vier buitelandse burgers wat gewerf is om in Namibië te werk. “Daarbenewens sluit ander oortredings wat via sosiale media gepleeg word, kuberafknouery, aanlyn seksuele uitbuiting van kinders, verspreiding van eksplisiete inhoud sonder toestemming, haatspraak en aanhitsing tot geweld in,” het Shikongo gesê.Hy het beklemtoon dat sulke oortredings “baie skadelik” is en ernstige gevolge kan hê onder Namibiese wetgewing.Oor die afgelope dekade het sosiale media volgens Shikongo die manier verander waarop mense kommunikeer, sake doen en interaksie het. “Dit het die weg gebaan vir vrye uitdrukking en globale konnektiwiteit. Hierdie selfde platform het egter, wanneer dit misbruik word, ’n teelaarde geword vir kriminele aktiwiteite, waninligting en gedrag wat die vrede en veiligheid van ons gemeenskappe ondermyn,” het Shikongo gesê.“Die veldtog is nie daarop gemik om vryheid van spraak te polisieer of verantwoordelike aanlyn interaksie te beperk nie. Dit gaan eerder daaroor om etiese verantwoordelikheid te bevorder, elke Namibiër aan te moedig om te dink voordat hulle iets plaas, te verifieer voordat hulle iets deel en betrokke te raak sonder om skade te veroorsaak. “'n Enkele roekelose plasing kan lewens, loopbane en reputasies vernietig asook die oortreder in die tronk laat beland,” het hy gesê.Deur die veldtog beplan Nampol om saam met skole, universiteite en gemeenskapsleiers te werk om veilige en etiese aanlyn gedrag te bevorder. “Ons sal die kapasiteit van ons kubermisdaadeenheid versterk om sosialemedia-verwante oortredings op te spoor, te ondersoek en te vervolg en hand aan hand met telekommunikasiemaatskappye en platformverskaffers werk om aanlyn misbruik op te spoor en te bekamp,” het Shikongo gesê.Die minister van inligting en kommunikasietegnologie, Emma Theofelus, was ook aan die woord by die bekendstelling en het Namibiërs aangemoedig om die geleenthede aan te gryp wat sosiale media bied, maar om steeds verantwoordelik in aanlyn ruimtes te wees. “Terwyl ons die groot krag en geleenthede aangryp wat sosiale media bied, moet ons ewe veel die uitdagings wat met die gebruik daarvan gepaardgaan, die hoof bied. “Vandag wil ek graag van die belangrikste kwessies aanspreek wat ons samelewing beïnvloed. Onder baie van hulle is waninligting, privaatheid en geestesgesondheid wat duisende van ons werksmag – beide volwassenes en jongmense – raak,” het Theofelus gesê. Sy het ook 'n paar maatreëls vir die veilige en verantwoordelike gebruik van aanlyn platforms gedeel.“Dis noodsaaklik dat ons ’n kultuur van kritiese denke kweek, die bronne van inligting bevraagteken, feite kruisverifieer en die drang weerstaan om inhoud te deel wat ons nie bevestig het nie,” het die minister gesê. – republikein@republikein.com.na

Byna 12 000 bedrogsake in drie jaar

Kommentaar

Republikein 2025-12-11

Meld asseblief aan om kommentaar te lewer

Byna 12 000 bedrogsake in drie jaar

Kommentaar

Republikein 2025-12-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.