Beweerde dwelmhandelaar ontsnap

’n Inwoner van die Demokratiese Republiek die Kongo wat op aanklagte van die besit en verspreiding van dagga agter tralies was, het uit die aanhoudingselle op Swakopmund ontsnap.Volgens die Namibiese polisie se woordvoerder in die Erongostreek, adj.komm. Erastus Iikuyu, het die 32-jarige Gilbert Kalenga na bewering die tralies van die kombuisvenster wat in die gang van die aanhoudingselle is, stukkend geknip, uitgeklim en weggehardloop. Kalenga wat met 27 kg dagga met ’n straatwaarde van N$1,35 miljoen betrap is, se formele aansoek om borgtog in Augustus verlede is deur landdros Conchita Olivier van die hand gewys. Kalenga het tydens die aansoek gesê hy sal nooit uit Namibië vlug nie, omdat hy homself as ’n Namibiër beskou. Die staatsaanklaer Beate Mwahi het egter die hof gewaarsku dat hy op die vlug kan slaan omdat hy reeds ’n vorige klag van die beweerde handel in kokaïen ter waarde van N$500, ook in Swakopmund, in die gesig staar. Volgens Mwahi is die kans ook goed dat hy hom aan soortgelyke oortredings sal skuldig maak as hy sou borgtog kry. Kalenga was uit op borgtog van N$3 000 vir die beweerde handel in kokaïen toe hy met die dagga betrap is. Hy en sy vrou is sedert 2018 in Namibië woonagtig en bly in die Osire-vlugtelingskamp naby Otjiwarongo. Die polisie vermoed hy het hierheen of na Windhoek gevlug. “Die soektog duur voort. Die omstandighede oor hoekom hy in die gang was, word intern ondersoek,” het Iikuyu gesê.Kalenga is tydens ’n polisie-operasie vasgetrek nadat hy ’n pakkie “hoendervoer” uit Otjiwarongo ontvang het en wat na bewering deur die eienaar van ’n plaas naby Hentiesbaai gestuur is. Tydens sy vorige hofverskynings het hy volgehou hy het gedink die dagga van meer as ’n miljoen Namibiese dollar wat na hom gekoerier is, is hoendervoer. Enige persoon met inligting oor waar hy hom bevind, kan Iikuyu by 081 246 4757, speurinspekteur Rosa Tjihavero by 081 821 4756 of hul naaste polisiekantoor kontak. Kalenga se ontsnapping kom ’n paar weke na dié van Issakar Asser, wat daarin kon slaag om ’n beampte van die tronk op Walvisbaai met ’n amptelike vrylatingsvorm te bluf. Volgens Iikuyu is Asser steeds soek. “Daar is foto’s van hom by McDonalds, maar ons het sover ek weet nie ’n McDonalds in Namibië nie.” – republikein@republikein.com.na

Beweerde dwelmhandelaar ontsnap

Kommentaar

Republikein 2026-02-04

Meld asseblief aan om kommentaar te lewer

Beweerde dwelmhandelaar ontsnap

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.