Woestynleeu glo vir trofee gejag

Claudia Reiter – “Nadat ons van betroubare bronne en informante verneem het dat die leeumannetjie, bekend as Mwezi, na bewering geskiet is, wil ons graag van die ministerie verneem wat die omstandighede was en wat so ’n beweerde moord regverdig.”So het die Desert Lions Human Relations Aid (DELHRA) in ’n brief aan die ministerie van die omgewing, bosbou en toerisme geskryf oor ’n beweerde voorval waar die woestynaangepaste swartmaanhaar-leeumannetjie, Mwezi of XPL 107, verlede Woensdag na bewering vir ’n trofee gejag is.“Hiervolgens is die opsporingstelsel van die satelliethalsband (wat veronderstel is om die leeus te beskerm) glo misbruik om die leeu in ’n beskermde gebied op te spoor.“Dit wil sê in die Palmwag-konsessie of, meer waarskynlik, in die aangrensende Skedelkuspark, deur trofeejagters wat deur die omgewingsministerie se amptenare vergesel is.”Die organisasie sê verder: “Op 12 Oktober het ons inligting van ons informant in Khowarib ontvang dat die Lion Rangers ’n waarskuwingsboodskap ontvang het dat ’n leeu in die nabygeleë Wild Veld Safari-jagkamp in Khowarib is. “Die boodskap word uitgestuur wanneer ’n leeu wat met ’n halsband toegerus is deur ’n geo-heining breek. Tydens die ondersoek het dit geblyk dit is ’n dooie leeu wat na bewering sedert die vroeë aand van 11 Oktober in die jagkamp aangehou is. “Mwezi is op 27 September waargeneem en afgeneem terwyl hy met ’n leeuwyfie, XPL 108, die laaste oorlewende van die Obab-trop, gepaar het en haar tot in die Skedelkuspark gevolg het, soos die spore aangedui het.”Volgens DELHRA het die ondersoek aan die lig gebring dat twee voertuie – een van die omgewingsministerie en die ander na bewering ’n jagvoertuig – die Palmwag-konsessiegebied binnegegaan het, met die bemanning wat “polisie-optrede” as rede aanvoer het.“Dit het saamgeval met die inligting wat later dieselfde dag van Khowarib ontvang is en ons het van ’n bron verneem dat die dooie leeu in die Khowarib-jagkamp die pragtige swartmaanhaar-woestynleeu Mwezi was, wat al ’n geruime tyd vir ’n jagtrofee gesoek word.”Die DELHRA meen ’n strafregtelike ondersoek – wat die vrystelling van die inligting afdwing – sal hierdie saak oplos en dat die betrokke partye vervolg moet word, indien geregverdig.Dit aangesien ’n permit om in die Palmwag-konsessie of Skedelkuspark te jag nie wettiglik toegestaan kan word nie.“Indien dit toegestaan word om in ’n konsessiegebied te jag, maar daar word in die beskermde gebiede Palmwag of Skedelkus gejag, sal sodanige magtiging as nietig geag word.“Op grond van ons inligting sal ons antwoorde op ons vrae of selfs ֽ’n gesamentlike en deursigtige ondersoek verwelkom. “Ons wil van die ministerie weet of ’n trofeejagpermit uitgereik is om XPL 107 te jag. Indien wel, kan die ministerie asseblief redes hiervoor verskaf? Ons vra vir ’n afskrif van die jagpermit en van die verslag van die beampte wat die jaggeselskap vergesel het. “Ons vra ook vir ’n afskrif van die webwerf se logboek en van al die gebruikers wat die ligging van hierdie leeu tussen 1 September en nou afgelaai het. Ons versoek afskrifte van verslae van voorvalle waarby XPL 107 moontlik betrokke was.“Ons beoog om ’n klag in te dien en die inligtingkommissaris en die Ombudsman te kontak, aangesien die vernietiging van natuurlike hulpbronne onder die jurisdiksie van hierdie liggame ineenstort as die ministerie nie reageer nie. “In so ’n geval kan diegene wat toegang tot die relevante inligting het as getuies geroep word.”Die woordvoerder van die omgewingsministerie, Romeo Muyunda, het teen druktyd nie op medianavrae gereageer nie. – republikein@republikein.com.na

Woestynleeu glo vir trofee gejag

Kommentaar

Republikein 2026-02-03

Meld asseblief aan om kommentaar te lewer

Woestynleeu glo vir trofee gejag

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.