'Windhoekers vertraag self projekte'

Windhoek se gesloer met die voltooiing van sommige projekte is weens inwoners wat weier om hul strukture te verwyder en sodoende in die pad van die konstruksie van paaie en uitbreiding staan.

Só he die minister van stedelike en landelike ontwikkeling, Sankwasa James Sankwasa, Maandag tydens ’n sooispitseremonie vir die opgradering van die Winnie Madikizela-Mandela-rylaan in die hoofstad gesê.

Volgens hom dring inwoners op ontwikkeling aan en word fondse beskikbaar gestel en kontrakteurs aangestel, maar word die projekte steeds nie voltooi nie aangesien inwoners weier om die geraakte gebiede te ontruim.

“In die geval van die Windhoek-munisipaliteit word daar paaie gebou. Maar nou het ons ’n ander probleem, ’n gebrek aan patriotisme onder sommige inwoners.

“Dis onpatrioties en vertraag nasionale projekte. En niemand behoort ’n situasie te skep waar ons die polisie moet bel om mense te verwyder of te hervestig nie,” het Sankwasa gesê.

Volgens hom het die munisipaliteit opdrag gekry om inwoners te hervestig, maar sommige het egter weerstand gebied. Die rede was glo nie omdat hulle nêrens heen gehad het om te gaan nie, maar omdat hulle gesê het “ek doen my besigheid hier”.

“Hulle het dit in ’n persoonlike ekonomiese kwessie omskep. En deur dit te doen, belemmer hulle ontwikkeling en vooruitgang,” het hy gesê.

Die minister het ’n beroep op inwoners van Windhoek gedoen om nasionale belange bo persoonlike belange te stel wanneer ontwikkelingsprojekte tot die breër voordeel van die stad en die land bekend gestel word.

“Soveel soos wat jy ’n besigheid uit ’n sinkhuis mag bedryf, bevoordeel daardie besigheid jou as individu, nie die nasie nie en nie al die stad se inwoners nie.”

Sankwasa het ook kommer uitgespreek oor die wanbesteding van openbare fondse en het verwys na geld wat terug in die staatskoffers beland ten spyte van dringende ontwikkelingsbehoeftes.

“As jy na die verantwoordbaarheidsverslag aan die begin van elke finansiële jaar kyk wat deur die ministerie van finansies ingedien is, word baie geld terug in die staat se koffers betaal wat nie deur verskeie ministeries en instellings gebruik is nie. Dan wonder jy, hoekom het ons hierdie geld in die eerste plek gevra?”

Hy het beklemtoon Namibië is nie noodwendig ’n arm land nie en dat die kernkwessie lê in hoe finansiële hulpbronne deur verskeie arms van die regering hanteer word.

“Wat ek in die paar maande gesien het sedert ek in die amp is en deur met plaaslike owerhede en streekrade te vergader, is dat Namibië nie noodwendig ’n arm land is nie. Namibië het nie noodwendig ’n gebrek aan finansiële hulpbronne nie,” het hy gesê.

Hy het burokrasie as een van die grootste vyande van nasionale ontwikkeling beskryf.

“Burokrasie is een van ons grootste vyande in ’n poging om ons land te ontwikkel.”

Nog ’n vorm van burokrasie lê volgens hom in die vertraagde betaling van kontrakteurs.

“As jy na die proses kyk, is dit dikwels niks meer as burokrasie wat deur individue geskep is wat veronderstel is om daardie betalings te fasiliteer sodat die werk betyds voltooi kan word nie.

“Mense wil wys hulle is belangrik en moet gesmeek word voordat hulle optree. Tog beweer hierdie selfde individue wanneer hulle vir werk aansoek doen, dat hulle hardwerkend, ervare en kundig is. Maar die oomblik wanneer hulle in diens geneem word, is daar geen teken van daardie ‘tien jaar ervaring’ wat hulle gelys het nie,” het Sankwasa gesê.

“Aan elkeen wat betrokke is in die verwerking van betalings aan kontrakteurs, in die Windhoek-munisipalilteit, ’n ministerie of enige deel van die openbare diens, is my beroep dat ons moet reageer op die verwagtinge van ons burgers en kiesers.

“Vyf jaar gelede het ons ontwikkeling belowe. Ons het gesê as ons verkies word, gaan ons dit lewer.

“Noudat ontwikkeling hier is, moet ons nie die struikelblokke wees wat in die pad staan nie. Ons moet nadink en verbind tot tydige dienslewering,” het die minister gesê.

Sankwasa het gesê die konstruksie van paaie is nie net vir motoriste nie.

“Dit gaan oor die verbetering van mobiliteit en verbinding vir alle burgers en inwoners. Maar wat ek gesien het in die ontwerp van ons paaie, veral in plaaslike gebiede, is dat daar een belangrike groep is wat ons voortdurend ignoreer – die fisiek gestremde lede van ons samelewing.

“Hoe is hulle veronderstel om te reis? Hoe gebruik hulle hul rolstoele op ons paaie? Ons skep nie vir hulle ’n ruimte nie,” het hy beklemtoon.

Volgens die minister is dit tyd dat die ontwerpe van geboue en paaie die behoeftes van fisiek gestremde inwoners in ag neem. Dit sluit volgens hom diegene in wat rolstoele gebruik en met krukke loop.

“Hulle moet toegewyde ruimtes hê. En as hulle nie op die hoofpaaie geakkommodeer kan word nie, kom ons skep ’n veilige ruimte, alternatiewe paaie sodat hulle ook deel van Namibië kan voel en die vryheid en onafhanklik geniet wat almal anders doen,” het hy gesê.

– [email protected]