Visserye vorder nie verwagte inkomste in

Die ministerie van visserye en mariene hulpbronne het voor sy integrasie met die ministerie van landbou, water en grondhervorming miljoene van sy bedryfs- en ontwikkelingsbegroting vir 2023-’2024 onderbestee. Volgens die ouditeur-generaal se jongste ouditverslag is sowat N$37 miljoen in inkomste steeds uitstaande.Die oudit, wat die boekjaar dek wat op 31 Maart 2024 geëindig het, weerspieël sistemiese onderbesteding in sleutelafdelings van die ministerie – van beleid en akwakultuur tot kapitaalprojekte – hoofsaaklik weens trae werwing, konstruksieprojekte wat tot stilstand gekom het en verkrygingsprobleme. Onder die grootste rooi vlae wat in die finansiële verslag uitgelig word, is die N$36,9 miljoen wat steeds aan die einde van die fiskale jaar uitstaande was. Die ministerie het verduidelik die oorskatte inkomste uit visvangkwotaheffings – wat N$58,6 miljoen beloop het – kan grootliks blameer word. Dié voorspellings is tipies gebaseer op wisselende Totale Toelaatbare Vangste (TAV’s) wat nie behoorlik met die finansiële jaar ooreenstem nie en sensitief is vir onvoorspelbare seetoestande.Die oudit toon ook die ministerie se afdeling vir akwakultuur vir die ondersteuning van visboerdery en binnelandse visserye het met ’n verstommende 18,22% onderbestee. Ongeveer N$8,8 miljoen is onbestee, met sleutelprojekte wat óf vertraag óf gestaak is. Die Mpungu-akwakultuur-visplaas in Kavango alleen het ’n onderbesteding van N$1,6 miljoen aangeteken weens laat aanstellings van kontrakteurs, terwyl die Leonardville-projek N$1,5 miljoen onbestee het aangesien die kontrakteur eers teen die einde van die boekjaar herstelkostevoorstelle ingedien het.Nog ’n visplaas in Keetmanshoop, die Fonteintjie-gemeenskapsprojek, was in ’n regsgeskil betrokke, wat gelei het tot N$200 690 wat nie bestee is nie. Die saak bly onopgelos, met hofinstruksies in die nuwe finansiële jaar wat vereis dat die ministerie diensverskaffers herevalueer en heraanstel.Intussen het die ministerie se afdeling vir beleid, beplanning en ekonomie met 25,37% onderbestee, wat neerkom op N$3,5 miljoen. Meer as N$2 miljoen daarvan was weens vertragings in die aanstelling van personeel, terwyl opleidingsplanne wat nie geïmplementeer is nie en bedrywighede wat weer geprioritiseer is, verder tot die finansiële tekort bygedra het.Vertragings om vakante poste te vul – ’n herhalende tema in verskeie afdelings – het ’n domino-effek gehad op onderbesteding aan werkgewers se bydraes tot pensioen en maatskaplike voorsorg. In verskeie gevalle het die finansiële las van verlofvergoeding en opleidingskoste ook onder die begrote beramings gedaal, wat die onderbestedingstendens verder aangevuur het.Een van die meer kommerwekkende items wat in die oudit geopper is, is die versuim om uitstaande skuld te betaal wat terugdateer na 2001. Drie fakture van ’n siviele strukturele ingenieur wat betrokke by ’n streekkantoorbouprojek was, bly ongesertifiseerd, wat verdere werk in die Kavangostreek vertraag en tot ’n onderbesteding van byna N$5 miljoen bydra. Die ingenieur het na bewering geweier om die werk te hervat totdat die saak opgelos is.In Hentiesbaai het ’n begrotingstoewysing van N$800 000 vir ’n haalbaarheidstudie oor ’n satellietkantoor onaangeraak gebly nadat die departement van werke glo die indiening van die verwysingsraamwerk vertraag het. – republikein@republikein.com.na

Visserye vorder nie verwagte inkomste in

Kommentaar

Republikein 2025-12-01

Meld asseblief aan om kommentaar te lewer

Visserye vorder nie verwagte inkomste in

Kommentaar

Republikein 2025-12-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.