Sankwasa moet opdrag terugtrek, eis RedForce

Nuusredaksie – In ’n regsbrief aan die minister van stedelike en landelike ontwikkeling, Sankwasa James Sankwasa, het RedForce Debt Management CC die onmiddellike terugtrekking van sy opdrag geëis wat plaaslike owerhede opdrag gee om nie kontrakte met dié skuldinvorderaar te hernu nie. Die maatskappy het die minister daarvan beskuldig dat hy ’n persoonlike wrok koester nadat sy munisipale dienste in Katima Mulilo afgesny is weens beweerde wanbetaling. RedForce het deur middel van sy regsverteenwoordigers, Etzold-Duvenhage, die minister daarvan beskuldig dat hy onwettig, irrasioneel en buite die omvang van sy magte opgetree het.Die firma se regsbrief – gedateer 7 Augustus 2025 – waarsku dat indien die opdrag nie teen 13 Augustus 2025 teruggetrek word nie, hulle die hoërhof sal nader om die wettigheid daarvan te betwis en skadevergoeding te eis vir laster en kwaadwillige leuens (injurious falsehood).RedForce beweer die opdrag kom neer op “onwettige inmenging” in die statutêre verkrygingsonafhanklikheid van plaaslike owerhede, wat beskerm word onder die Wet op Openbare Verkryging van 2015.“Hierdie opdrag is ultra vires, irrasioneel en teenstrydig met die beginsels van prosedurele billikheid en administratiewe geregtigheid,” het die maatskappy aangevoer en bygevoeg dat geen gesprekvoering die minister se opdrag voorafgegaan het nie.“Ons kliënt se kontrakte is nie die gevolg van diskresionêre ministeriële guns nie, maar van deursigtige en mededingende tenderprosesse wat deur die wet gereguleer word,” het die prokureurs geskryf.BEWEER PERSOONLIKE MOTIEFRedForce beweer verder die minister is moontlik deur persoonlike ontevredenheid gemotiveer, met verwysing na ’n beweerde gesprek by die Windhoek-buitekluboord vroeër vanjaar waartydens Sankwasa na bewering sy ontevredenheid uitgespreek het oor die ontkoppeling van sy munisipale dienste in Katima Mulilo – ’n saak wat deur RedForce namens die plaaslike raad bestuur is.RedForce se prokureurs het gewaarsku die opdrag, tesame met gepaardgaande openbare verklarings, is lasterlik. “Die reputasieskade wat deur u ongegronde openbare verklarings veroorsaak word, is onberekenbaar,” lui die brief.RedForce het geëis die ministerie moet binne sewe dae die regsbasis, ondersteunende dokumentasie en redenasie wat tot die opdrag gelei het, verskaf.“Al ons kliënt se regte, beide wetlik en billik, bly streng en ten volle voorbehou,” sluit die brief af.OPDRAGSankwasa het verlede Maandag ’n opdrag aan al die plaaslike owerhede landswyd uitgereik waarin hulle aangemoedig word om nie enige nuwe ooreenkomste met RedForce te hernu of aan te gaan nie, met verwysing na openbare ontevredenheid met die maatskappy se bedrywighede.“Hierdie ministeriële opdrag moet sonder versuim nagekom word, aangesien dit ’n negatiewe uitwerking op ons burgers het,” het hy in ’n brief aan burgemeesters en uitvoerende hoofde van plaaslike owerhede gesê.Sankwasa het RedForce daarvan beskuldig dat dié skuldinvorderaar “ekonomiese en politieke uitdagings en probleme vir burgers en inwoners in al die plaaslike owerhede wat van die maatskappy se dienste gebruik maak, veroorsaak”.ONTLOK ONMIDDELLIKE REAKSIEVerskeie plaaslike owerhede het egter reeds aangedui hulle gaan nie aan die opdrag voldoen nie, en dit as te verreikend en wetlik gebrekkig beskryf.Die uitvoerende hoof van Katima Mulilo, Raphael Liswaniso, het die opdrag as “nie wettig” beskryf en verwys na artikel 2 van die wet op openbare verkryging, wat die doelwitte van verkryging uiteensit, insluitend integriteit, deursigtigheid, billike handel en wettigheid.Hy het verder artikel 3(2) van dieselfde wet aangehaal, wat bepaal dat indien enige opdrag teenstrydig is met openbare verkrygingswette of -regulasies, die wet op openbare verkryging voorrang geniet.“Met ander woorde, as ’n ministeriële opdrag die bepalings van die wet weerspreek, geld die wet – en sodoende word so ’n opdrag onwettig,” het hy opgemerk.EIENAAR VERWERP BEWERINGSIntussen het Selma Nangombe, die eienaar van RedForce, bewerings dat haar maatskappy in buitelandse besit is, verwerp.“Ek het met kommer kennis geneem van die herhaaldelike verspreiding van berigte wat valslik beweer dat RedForce ’n Zimbabwiese maatskappy is. “Hierdie stellings is feitelik verkeerd, misleidend en lasterlik van aard,” het sy Donderdag aan Network Media Hub (NMH) gesê.“RedForce Debt Management CC is ’n volledig Namibiese maatskappy wat behoorlik onder die toepaslike wette van die Republiek van Namibië geregistreer is. Ek is die enigste lid en eienaar van die entiteit.”Sy het verduidelik die teenwoordigheid van buitelandse burgers in bestuursposte is nie gelykstaande aan buitelandse eienaarskap nie. Julius Nyamazana, wat in Zimbabwe gebore is, dien tans as RedForce se uitvoerende hoof.“’n Maatskappy wat wettiglik in Namibië geregistreer is, kan nie as ‘in buitelandse besit’ geklassifiseer word nie, ongeag die nasionaliteit van sy bestuurders wat wettiglik in diens is en in Namibië woon. Dis ’n regskwessie, nie spekulasie of sentiment nie,” het Nangombe beklemtoon.Toe Sankwasa Donderdag vir kommentaar genader is, het hy gesê hy is te besig om op RedForce se eise te reageer.– republikein@republikein.com.na

Sankwasa moet opdrag terugtrek, eis RedForce

Kommentaar

Republikein 2025-10-14

Meld asseblief aan om kommentaar te lewer

Sankwasa moet opdrag terugtrek, eis RedForce

Kommentaar

Republikein 2025-10-14

Meld asseblief aan om kommentaar te lewer

MELD AAN

Advertensie