Pensioenverhoging vertraag

Duisende senior burgers het nie dié maand die pensioenverhoging van N$100 ontvang nie.

Op navraag het die minister van finansies en staatsondernemings, Ipumbu Shiimi, gesê: “Die ministerie in die presidensie verantwoordelik vir geslagsgelykheid is die regte owerheid om jou vraag te antwoord.

“Ek kan bevestig dat die verhoging aan pensioenarisse terugwerkend sal wees sodra die begroting goedgekeur is. Ons bespreek steeds die begroting in die parlement. Ek glo teen Mei sal die begroting goedgekeur wees.”

Dié ministerie se woordvoerder, Wilson Shikoto, het bloot gesê die ministerie van geslagsgelykheid, armoede-uitwissing en maatskaplike welsyn “is die bewaarder van pensioen-uitbetaling”.

Die woordvoerder vir die ministerie in die presidensie verantwoordelik vir geslagsgelykheid, armoede-uitwissing en maatskaplike welsyn, Lukas Haufiku, het gesê sy ministerie is besig om aan ’n mediaverklaring te werk en het belowe om dit vry te stel sodra dit gereed is.

Teen druktyd is nog geen verdere inligting ontvang nie.

Die maandelikse toelaag vir gestremde mense sou ook dié maand met N$100 toegeneem het.

Volgens die nasionale voorsitter van die Nasionale Federasie van Mense met Gestremdheid in Namibië (NFPDN), Matheus Hashoongo, wag sy lede ook op die verhoging, veral die minderjarige Namibiërs met gestremdhede, wie se toelaag vanaf N$250 per maand na N$1 400 per maand moet verhoog.

“Soos dit aangekondig is, verwag ons die verhoging maar ons weet nie hoe vinnig die ministerie sal werk nie, of wanneer ons dit sal ontvang nie. Op papier lyk dit goed maar ons wag nog,” het hy gesê.

– [email protected]