NIPDB val nie meer onder president

Die Namibiese raad vir bevordering van beleggings en ontwikkeling (NIPDB) is nou ten volle geïntegreer in die ministerie van internasionale betrekkinge en handel (MIRT), hangende die finalisering van die nuut beoogde agentskap vir die bevordering vir Namibiese beleggings.

Volgens die ministerie se uitvoerende direkteur, Ndiitah Nghipondoka-Robiati, sluit hierdie ontwikkeling ’n proses af wat begin het na ’n aankondiging in Junie 2025 dat die NIPDB van die kantoor van die president, waar dit sedert sy stigting in Januarie 2021 gehuisves was, na die ministerie sou oorskuif.

"Vanaf die laaste algemene jaarvergadering (AGM) wat op 15 September 2025 gehou is, is die statute gewysig sodat dit onder die ministerie van internasionale betrekkinge val. Die wetsontwerp op die bevordereing van Namibiese beleggings sal die agentskap vir die bevordering vir Namibiese beleggings skep, wat dan volgens wet onder die ministerie sal val,” het Nghipondoka-Robiati gesê.

Die NIPDB sal onder die ministerie funksioneer, wat die bewaarder van handelsbeleid is, het sy bygevoeg.

Gedurende die oorgangstydperk word daar nie verwag dat NIPDB-werknemers enige van hul voordele sal verloor nie. 

Nghipondoka-Robiati het gesê: “Ja, vir nou, totdat ons ’n nuwe entiteit het. Ons het kontraktuele verpligtinge wat ons respekteer.”

Toe minister Selma Ashipala-Musavyi vandeesweek haar personeel toegespreek het, het sy NIPDB-werknemers by die ministerie verwelkom.

“Ek verwelkom ons ​​kollegas van NIPDB onder leiding van die waarnemende uitvoerende hoof, Jessica Hauuanga, hartlik terug by die ministerie. Ek sou nalatig wees as ek nie ook die uitgaande uitvoerende hoof van NIPDB, dr. Nangula Uaandja, vir haar leierskap en toewyding bedank nie,” het sy gesê.

“Terwyl ons ons kollegas terug by die ministerie verwelkom, laat ek die volgende beklemtoon: Ons hoort almal hier. Verandering bring altyd sy deel van uitdagings, maar dit bied ook geleenthede vir groei en verbeterde samewerking. 

“Ons het mekaar nodig en ek sien uit daarna om saam met julle almal te werk op hierdie kritieke reis om 'Groei by die Huis' te skep,” het Ashipala-Musavyi bygevoeg.

Wyle voormalige president Hage Geingob het die NIPDB in Januarie 2021 as ’n Artikel 21-maatskappy gestig, onder die presidentskap gehuisves om beleggingsgeleenthede in die land te bespoedig.

– [email protected]