N$15 vir toiletware, sanitêre doekies

Henriette Lamprecht - Die ministerie van onderwys, kuns en kultuur het die finansiering vir gesondheids- en higiëneprodukte vir behoeftige leerlinge tot N$15 per leerling verhoog. Dié bedrag moet gebruik word om toiletware en sanitêre doekies te koop. Die totale bedrag vir gesondheid en higiëne styg dus tot N$12,26 miljoen jaarliks, gebaseer op die 819 749 leerlinge wat tans in skole oraloor die land geregistreer is.Minister Anna Nghipondoka het egter gemaan hoewel verskeie ministeries betrokke is om sanitêre produkte aan leerlinge te verskaf, die verantwoordelikheid ook deur ouers gedeel moet word. Sy het beklemtoon alle ministeriële programme neem die gesondheids- en higiëniese behoeftes van meisies én seuns in ag.“Ons het die afname in die deelname van seuns gesien, omdat ons nie hulle behoeftes ook in ag neem nie,” het sy gesê.Volgens haar moet skole sedert 2016 N$5, vermenigvuldig deur die totale aantal leerlinge wat by die skool ingeskryf is, aan die Dignity Project toeken waaruit die produkte gekoop word. “Die toekenning per leerling sluit alle leerlinge in ’n skool in, ook dié wat nie dit nodig het nie, byvoorbeeld seuns en jong leerlinge asook dié wat nie as behoeftig beskou word nie en dit self kan bekostig,” het die minister verduidelik. Volgens haar maak die gebruik van die skooltoelaag, bykomend tot die toekenning per leerling, voorsiening vir gesondheids- en higiëniese produkte in die sin dat die skool ’n maksimum aanvangsbedrag van N$2 000 vir primêre skole en N$3 000 vir sekondêre skole voorsien. Dié geld is vir ’n projek wat inkomste genereer vir die aankoop van sanitêre doekies en ander noodsaaklike toiletware vir behoeftige leerlinge.“Die aanvangsbedrag is apart van die toekenning per leerling. Dit moet onderhou word deur skenkings en fondsinsamelings om die volhoubaarheid van die Dignity Project te verseker,” het Nghipondoka verduidelik. Sy het die moontlikheid van ’n gebrek aan implementering van die betrokke programme deur leierskap by skole erken en gesê monitering sal verskerp word om te bepaal of die Dignity Project die gewenste impak het.Behoeftige leerlinge wat vir die skenkings kwalifiseer, word deur lewensvaardigheidsonderwysers in alle skole in die land geïdentifiseer.Met verwysing na die skooltoelaagbeleid sê die minister dit maak voorsiening vir die gelyke toekenning van toelaes aan skole op die basis van hul sosioëkonomiese status. Individuele leerlinge se behoeftes en in veral wees- en kwesbare leerlinge word oorweeg. Volgens haar het die ministerie N$439 385 vanjaar bestee om waardigheidspakkies (dignity packs) wat onder meer tandepaste en sanitêre doekies insluit, aan 1 480 seuns en meisies in Omusati en Ohangwena te skenk. Die gemeenskapsgeleide skoolsanitasieprogram (CLSS) fokus onder meer ook op die bestuur van menstruele higiëne (MHM) wat vereis dat skole ’n MHM-klub moet hê wat beide seuns en meisies moet insluit. Die program is volgens Nghipondoka sedert 2018 in vier streke, naamlik Ohangwena, Kavango-Oos en –Wes en Zambezi, terwyl Omusati ook vanjaar aangesluit het. Skole wat die CLSS-programme in hul skole het, probeer volgens die minister seker maak sanitasiegeriewe is beskikbaar vir alle leerlinge en veral vir meisies om veilig van hul gebruikte sanitêre doekies ontslae te raak. Met verwysing na sanitasie, sê Nghipondoka nog 70 sanitasiegeriewe is vanjaar tussen Junie en September gebou. – henriette@republikein.com.na

N$15 vir toiletware, sanitêre doekies

Kommentaar

Republikein 2026-09-18

Meld asseblief aan om kommentaar te lewer

N$15 vir toiletware, sanitêre doekies

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.