Covid-19: Familielede kan herbegrawe word

Elizabeth //Kheibes – Die minister van gesondheid en maatskaplike dienste, dr. Kalumbi Shangula, het aangekondig dat gesinne die liggame van hulle geliefdes kan laat opgrawe wat weens Covid-19 dood is en op so ’n manier begrawe is wat as onwaardig of in isolasie beskou word.Ons susterkoerant Namibian Sun het kommentaar van die minister gevra na aanleiding van mediaberigte verlede week dat president Hage Geingob – op aanbeveling van die nasionale raadgewende erekomitee – toestemming aan die familie van die ontslape goewerneur van die Erongostreek, Cleophas Mutjavikua, verleen het om sy liggaam op te grawe.Hy is vroeg in 2021 in ’n hospitaal op Grootfontein dood, glo weens komplikasies wat met Covid-19 verband hou, en is in die dorp begrawe onder die streng protokolle wat destyds gevolg is om die verspreiding van die virus te bekamp.Sy oorskot sal op 4 November opgegrawe word en sal by die dorp Ongongoro in die Otjozondjupastreek herbegrawe word.Shangula het in ’n telefoniese onderhoud gesê daar is geen gesondheidsrisiko’s daaraan verbonde om liggame op te grawe nie, ook nie as die mense aan Covid-19 dood is nie.“Dit is nie die eerste lyk wat opgegrawe en weer iewers anders begrawe word nie. Verskeie lyke is opgegrawe om op ’n plek wat die familie verkies, herbegrawe te word. Die polisie word ook gereeld gevra om ’n lyk op te grawe wat ondersoek moet word,” het hy gesê.LYKE KON NIE VERVOER WORDTerwyl verwarring en samesweringsteorieë tydens die pandemie hoogty gevier het, het talle inwoners daarop aangedring dat Covid-19-slagoffers buite bestaande begraafplase begrawe word, uit vrees dat die virus sulke plekke sou besmet en toekomstige begrafnisse sou beïnvloed.Van die noemenswaardige begrafnisse wat woede tydens die pandemie ontketen het, was toe die land se eerste slagoffer van die virus – die Walvisbaaier Elias Uutoni (45), wat in Julie 2020 gesterf het – in die duine by Narraville begrawe is.Soos in Mutjavikua se geval, kon talle mense wat aan Covid-19 dood is nie in hul dorpe begrawe word nie, aangesien die vervoer van dié liggame ingevolge die destydse regulasies verbied is. Die regering het die beheer van die begrafnisse oorgeneem.Die polisie se streekbevelvoerder in die Omusatistreek, kommissaris Ismael Basson, het verlede week gesê enigiemand wat familielede wil herbegrawe, moet die wetlike prosedures volg.“Daar is ’n aansoek wat by die landdroshof ingedien sal moet word, wat dan sal besluit of die liggaam opgegrawe en herbegrawe kan word al dan nie,” het hy gesê.“Ek dink nie die mense wat die liggaam opgrawe sal beskermende toerusting moet dra nie, aangesien dit ’n liggaam sou wees wat erg ontbind is. Lede van die polisie, wat dié proses sal behartig, sal deur die hof opdrag gegee word oor wat hulle moet of nie moet doen nie,” het hy gesê.Die Wêreldgesondheidsorganisasie (WHO) het berig 172 123 bevestigde Covid-19-gevalle is tussen 3 Januarie 2020 en 25 Oktober 2023 in Namibië aangemeld, met 4 100 sterftes. – republikein@republikein.com.na

Covid-19: Familielede kan herbegrawe word

Kommentaar

Republikein 2025-05-01

Meld asseblief aan om kommentaar te lewer

Covid-19: Familielede kan herbegrawe word

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie