Bosbou slaan toe op Kunene-koleboere

Die direktoraat van bosbou in die ministerie van die omgewing, bosbou en toerisme het in begin Mei op plase in die Kunenestreek toegeslaan waar beskermde mopaniebome vir houtskool en brandhout geoes en uitgevoer word.Daar is reeds beslag op vragmotors met vragte hout en houtskool sonder permitte gelê, het die bosboudirektoraat bevestig. ’n Ontstoke houtskoolprodusent in die Outjo-distrik wat verkies om anomiem te bly, beweer ’n bosboubeampte het hom gedreig en omkoopgeld van hom geëis om nie sy houtskoolbedryf te staak nie.“Wat is jou kole vir jou werd?” het Taddius Nagangombe, die hoofbosboubeampe vir die streke van Kunene en Otjozondjupa, glo die boer gedreig.Nagangombe, wat op Otjiwarongo gebaseer is, het die beweringe ten sterkste ontken en aan NMH gesê hy doen net sy werk en voer opdragte van bo uit om die massastroping van beskermde mopaniebome in die Kunenestreek stop te sit.“Hy is baie bang en hy het saam met polisiemanne gekom wat met AK47’s uitgeklim en my gedreig het. Die kilns is gestop en hulle wou byle konfiskeer. Ek het gevra waar is die lasbrief?” het die boer gesê. “My permit is in April deur die bosboudirektoraat uitgereik en is geldig tot einde Julie, maar hulle stop my. Hulle ry van plaas tot plaas saam met die polisie.“Hulle wil alles konfiskeer – van ons hout, kole, trekkers en sleepwaens – en hulle wil ons arresteer. Daar is klomp van ons werkers wat verdwyn het oor die manier hoe hulle tussen die werkers rondgestap het.” Hy sê die houtskoolwerkers werk hoofsaaklik op skuld en “ons verloor elke dag want ons kan nie aangaan nie”.Die produsent sê alle permitte vir die vervoer en uitvoer van houtskool is gestop en dit sluit dié van groot houtskoolfabrieke in. KOMMERSIëLE OES VAN MOPANIE GESTAAKDie adjunk-bosboudirekteur, Michael //Otsub, het aan NMH bevestig dat alle permitte vir die oes, vervoer en uitvoer van mopanie tydelik gestaak is. Die ministerie het reeds in November verlede jaar die kommersiële oes van mopaniebome in die Kunenestreek gestaak nadat die onvolhoubare oes van hierdie beskermde spesie opgemerk is. “Daar was verlede jaar konsultasie met die belanghebbendes en hulle is toegelaat om mopanie te oes, maar ons het intussen besef dat die meeste van hulle nie verander het nie,” het //Otsub gesê. “Ons moes intree en hulle stop. Daar is meer spanne wat gaan inkom sodat ons deur al die plase kan gaan en hulle ondersoek.”Nagangombe sê bosboubeamptes moet ’n polisiebeampte na plase vir die ondersoek en beskerming saamneem. “Die boere is kwaad vir en wil my naam beswadder. Ek sal nooit omkoopgeld vra of aanvaar nie,” het hy beklemtoon. Beide het hul kommer oor die massavernieting van mopaniebome in die Kunenestreek uitgespreek, “veral oor die meerderheid produsente wat skuil agter ontbossing en net geld wil maak”. Een boer het volgens Nagangombe 30 hektaar mopaniebome met gif bespuit.Kommer is ook uitgespreek oor Angolese werkers wat sonder werkspermitte en teen laer lone as Namibiërs op plase werk. NEXUS CHARCOALDie bestuurder van Nexus Charcoal op Outjo, Rian Smit, het bevestig dat ’n vrag houtskool op hul vragmotor gekonfiskeer is omdat ’n vervoerpermit nie op die lorrie was nie, “maar hulle moes my net ’n boete gee”. Hy sê in dié geweste is meestal mopanie en ons moes ontbos. “Volgens inligting van die Houtskoolvereniging van Namibië (COAN) sou geen nuwe permitte uitgereik word voordat ’n oudit nie op plase gedoen word nie. “Bosbou sou vanaf Desember inspeksies op plase kom doen het, maar hulle het glo nie genoeg personeel nie. Nou daag hulle net op en maak ons toe.”Smit sê hy is ontvrede want Nexus kan nie kole kry nie, “want die plase is toegemaak wat kole aan ons lewer”.COANDie hoofbestuurder van COAN, Michael Degé, het besoek aan plase gebring wat sê hul houtskoolbedryf is onder briljante toestande.“Ons is besig om alles onder beheer te bring. Ek sal nog met bosbou praat wat nie die prosedures gevolg het nie. Groot fabrieke en boere wat COAN-lede is, kan weer uitvoer en vragmotors is weer op die pad met vervoer- en uitvoerpermitte wat weer toegelaat word,” het hy laat gistermiddag gesê.“Oespermitte van mopaniebome moet eers deur die bosboudirekteur in Windhoek goedgekeur word omdat dit ’n beskermde spesie is en inspeksies sal weer op plase uitgevoer word.” – francoise@nmh.com.na

Bosbou slaan toe op Kunene-koleboere

Kommentaar

Republikein 2025-12-19

Meld asseblief aan om kommentaar te lewer

Bosbou slaan toe op Kunene-koleboere

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.