Bestuurskole in minister se visier

Die minister van werke en vervoer het opdrag aan die Vervoerkommissie van Namibië gegee om die dekriminalisering van geringe verkeersoortredings te prioritiseer en die regulering van bestuurskole binne die volgende ses maande te verskerp.

Volgens minister Veikko Nekundi is dié hervormings lank reeds uitstaande om dissipline, professionaliteit en regverdigheid op Namibië se paaie te herstel.

Nekundi het Maandag tydens die amptelike inhuldiging van die nuwe kommissie in Windhoek gesê die huidige wetlike raamwerk hanteer steeds geringe padoortredings soos oorlading van voertuie of vervalde dokumentasie as strafregtelike oortredings – ’n verouderde benadering wat nie meer die openbare belang dien nie.

“Ons kan nie strafregtelike oortredings onder normale verkeersregulasies hê nie. Oorlading of om drie koeie in ’n sleepwa te vervoer ’n strafregtelike oortreding te maak, maak nie sin nie.

“Ek verwag dat die nuwe kommissie sal verseker dat die dekriminaliseringsproses sonder versuim geïmplementeer word,” het Nekundi gesê.

Volgens hom is ’n konsepraamwerk vir die hervorming reeds ontwikkel. Nekundi het opdrag gegee dat die kommissie moet toesig hou oor die volle implementering daarvan binne hul ses maande termyn.

“My kollegas het reeds die raamwerk opgestel. Julle moet julle deel doen om te verseker dat ons teen die einde van die jaar mylpale in die implementering daarvan bereik het,” het Nekundi gemaan.



BESTUURSKOLE

Nekundi het ook kommer uitgespreek oor die toename in ongereguleerde bestuurskole en gewaarsku dat swak opleidingstandaarde ongedissiplineerde bestuurders kweek.

“Ons het heelwat bestuurskole in hierdie land, en daar is niks daarmee verkeerd nie. Maar om ander te onderrig, moet jy eers gekwalifiseerd wees,” het hy beklemtoon.

“Jy kan nie iemand leer bestuur as jy self rooi verkeersligte verontagsaam nie.”

Die ministerie gaan ook deur die kommissie ’n nasionale kwalifikasie- en lisensiëringsraamwerk vir bestuursinstrukteurs vrystel wat sal verseker dat alle instrukteurs gesertifiseer, geregistreer en periodiek hernu word.

“Diegene wat ander oplei, moet gekwalifiseerd en geregistreer wees – hul eie gedrag moet die dissipline weerspieël wat ons op ons paaie verwag,” het Nekundi gesê en gewaarsku dat die era van “enigiemand wat ’n bestuurskool oopmaak” tot ’n einde kom.



VERVOERSEKTOR

Die kommissie moet verder die openbare vervoersektor ’n professionele baadjie gee.

Nekundi het taxi- en busoperateurs ook aangemoedig om hul besighede te formaliseer.

“As jy ’n taxi bestuur, moet jy ’n formele kontrak hê. Jy moet deel wees van ’n geregistreerde entiteit – of dit nou ’n eenmansaak of maatskappy is – en voldoen aan die maatskaplike voorsorgfonds- en arbeidswette,” het Nekundi gesê.

Volgens hom sal dit aanspreeklikheid, veiligheid en maatskaplike beskerming vir beide bestuurders en passasiers verbeter.



LISENSIES

Hy het ’n beroep gedoen vir die dringende hervorming in die land se lisensiëringsproses en gesê dit is onaanvaarbaar dat motoriste maande moet wag om hul rybewyse te ontvang.

“Ons kan nie hê dat mense drie of ses maande vir ’n lisensie wag nie. Dit moet verander. Die proses moet nie meer as vier of vyf dae neem nie,” het hy gesê.

Hy het bygevoeg dat bestuurdersgeskiktheid ’n bron van kommer bly en het vervoeroperateurs aangespoor om te verseker dat slegs individue wat medies geskik is agter die stuurwiel inskuif.

“Jy kan nie iemand met epilepsie ’n vragmotor laat bestuur nie. Operateurs moet gereelde mediese ondersoeke doen – veiligheid moet eerste kom,” het hy gesê.



MANDAAT

Nekundi het die nuwe raad herinner aan hul verpligtinge ingevolge die Wet op Padverkeer en Vervoer van 1999 en die Wet op Openbare Ondernemingsbestuur van 2019, met die klem op deursigtigheid, integriteit en verantwoordbaarheid.

“Die vervoerkommissie dra die gewigtige verantwoordelikheid om veilige, doeltreffende en volhoubare vervoerstelsels te verseker wat Namibië se ekonomiese groei dryf,” het hy gesê.

Nekundi het bygevoeg dat die sukses van hul termyn die toon sal aangee vir langtermynhervormings in die sektor.

“U prestasie sal bepaal of Namibië die moderne, gedissiplineerde en billike vervoerstelsel bereik wat ons mense verdien,” het hy gesê.

Die nuwe lede van die Vervoerkommissie van Namibië, wat tydelik vir ses maande aangestel is, is Loini Shikale (voorsitter), Joe Shipepe (lid), Johannes Thikusho (lid), en dr. Helvi Petrus (lid).

– [email protected]