21 745 kinders soek beskerming in 2023

Namibië se kinderbeskermingstelsel het in 2023 die hoogste jaarlikse vraag in ’n dekade aangemeld, met 21 745 kinders wat maatskaplike ingrypings ontvang het.

Dit luidens die verslag oor statistieke rakende kindersorg en -beskerming in Namibië vir 2014-’23, wat vandeesweek uitgereik is.

Die verslag, wat Woensdag deur die ministerie van geslagsgelykheid en kinderwelsyn vrygestel is, toon dat hoewel dienste vir kinderbeskerming landswyd uitgebrei het, voorsteliniewerkers steeds toenemende druk ervaar.

Dit weens toenemende psigososiale behoeftes, geweld teen kinders en ingewikkelde maatskaplike uitdagings wat gesinne raak.

Tydens die bekendstelling het minister Emma Kantema-Gaomas gesê die verslag bied meer as net statistieke, aangesien elke syfer ’n kind verteenwoordig wat beskerming, ondersteuning of ingryping nodig het. 

“Die statistiek in hierdie verslag moet nie as abstrakte syfers beskou word nie. 

“Agter elke getal skuil ’n kind wat moontlik beskerming teen mishandeling, verwaarlosing, uitbuiting, geweld, skadelike praktyke of emosionele nood nodig het,” het Kantema-Gaomas gesê.

Oor die oorsigtydperk het 173 785 kinders landswyd maatskaplike ingrypings ontvang, terwyl die algehele lewering van dienste tussen 2014 en 2023 met 26% toegeneem het.

Die verslag toon dat kinderbeskermingsdienste herstel het ná ontwrigtings wat deur die Covid-19-pandemie veroorsaak is. Die aantal kinders wat dienste ontvang het, het in 2021 tot 8 937 gedaal, voordat dit in 2022 tot 18 583 toegeneem en die daaropvolgende jaar ’n rekordhoogtepunt bereik het met 21 745.

Tydens die voorlegging het Rosida Palema, adjunkdirekteur van die Residensiële Kindersorgfasiliteit (RCCF), gesê die verslag weerspieël gevalle wat deur die ministerie se saakbestuurstelsel vir maatskaplike werk in al 14 streke hanteer is. 

“Hierdie verslag bied statistiek oor kinders wat deur middel van die saakbestuurstelsel ondersteun is, soos deur streekmaatskaplike werkers geïmplementeer is, asook statistiek oor begunstigdes van staatstoelaes vir kinders tussen 2014 en 2023,” het Palema gesê.

Sy het gesê die verslag is opgestel om tendense in kinderbeskerming te monitor, programme te evalueer en bewyse te verskaf om beleidsbesluite en die toewysing van hulpbronne te bestuur.

GEESTESGESONDHEID

Psigososiale ondersteuning het as die grootste gebied van ingryping na vore getree en het 43,3% van al die kinderbeskermingsdienste uitgemaak wat tydens die oorsigtydperk gelewer is.

Die dienste sluit berading, emosionele ondersteuning, traumaherstel en programme vir gesinsversterking in.

Palema het gesê dit weerspieël ’n toenemende vraag na geestesgesondheids- en psigososiale dienste onder kwesbare kinders.

Kantema-Gaomas het gesê dié gevalle sluit kinders in wat noodsorg, ondersteuning vir die herintegrasie in skole, berading vir gedragsuitdagings, hulp aan tienerma’s wat na die skoolbanke terugkeer, toegang tot geboortesertifikate, onderhoudsondersteuning en ander noodsaaklike dienste benodig. 

“Hierdie tipe gevalle oorheers die werkslas van ons maatskaplike werkers en die verslag weerspieël die omvang van hierdie psigososiale uitdagings,” het sy gesê.

Kwessies rakende kindersorg en -toegang het 17,2% van die dienste uitgemaak en ingrypings wat met geweld teen kinders verband hou, 10,5%. Pleegsorg het 9,1% verteenwoordig, gevolg deur dienste vir kindergeregtigheid met 7,9%.

Volgens die verslag het dienste vir psigososiale ondersteuning oor die dekade met 63,5% toegeneem, terwyl voorvalle van geweld teen kinders met 59,8% gestyg het.

Kantema-Gaomas het gesê geweld teen kinders is steeds ’n groot bron van kommer, met bevindinge uit die 2019-opname oor geweld teen kinders wat toon dat 39,6% van vroue en 45% van mans tussen die ouderdomme van 18 en 24 fisieke, seksuele of emosionele geweld tydens hul kinderjare ervaar het.

Sy het gesê administratiewe data uit die verslag bevestig dat geweld teen kinders steeds een van die leidende beskermingskwessies is wat deur maatskaplike werkers hanteer word, veral in die streke van Khomas, Erongo en Oshikoto. 

“Hierdie werklikheid vereis sterker voorkoming, vroeër identifikasie, ’n gekoördineerde reaksie en volgehoue ​​sorg vir kinders en gesinne,” het Kantema-Gaomas gesê.

ONGELYKHEDE

Volgens die verslag het die Khomasstreek die hoogste aantal kinderbeskermingsdienste gedurende die dekade aangeteken, gevolg deur Oshikoto, Erongo en Hardap.

Palema het dit grootliks aan die bevolkingsgrootte, verstedeliking en die beskikbaarheid van gespesialiseerde kinderbeskermingsdienste toegeskryf.

Daarteenoor het Kavango-Wes die minste dienste aangemeld, deels omdat die streek eers ná sy totstandkoming afsonderlik begin verslag doen het en daar geen spesifieke data daaroor vir 2018

beskikbaar was nie.

“Die verskille tussen streke beklemtoon dat behoeftes aan kinderbeskerming en die gebruik van dienste nie eweredig versprei is nie, met dienste wat in ’n paar streke met ’n hoë vraag gekonsentreer is,” het sy gesê.

TOELAES

Benewens direkte maatskaplike ingrypings, beklemtoon die verslag ’n beduidende toename in staatstoelaes vir kinders.

Die aantal kinders wat by staatstoelaes baat vind, het van 164 434 in 2014 tot 377 164 in 2023 toegeneem, wat ’n groei van meer as 129% verteenwoordig. Die grootste toename is aangeteken by die toelaes vir kwesbare kinders, waar die aantal begunstigdes gedurende die oorsigtydperk van 8 238 tot 254 771 gestyg het.

Die aantal ontvangers van pleegsorgtoelaes het egter met ongeveer 61% afgeneem – ’n tendens wat die departement aan beleidshervormings toeskryf, wat gesinsbewaring en sorg deur familielede bevorder, asook strenger geskiktheidsvereistes vir pleegsorg.

BELEGGING IN VOORKOMING

Kantema-Gaomas het gesê die verslag behoort as ’n padkaart vir sterker maatreëls vir kinderbeskerming te dien, met groter klem op voorkoming en vroeë ingryping.

Sy het gesê die regering sal fokus op die versterking van kinderbeskermingsforums, die verbetering van koördinering tussen sektore, die ondersteuning van voorsteliniewerkers en die ontplooiing van maatskaplike werkers na kritieke gebiede, insluitend eenhede vir beskerming teen geslagsgebaseerde geweld en kiesafdelingskantore. 

“Die verslag moet ’n praktiese hulpmiddel vir optrede word vir almal in die kinderbeskermingsektor,” het Kantema-Gaomas gesê.

Sy het bygevoeg kinderbeskerming is steeds ’n gedeelde verantwoordelikheid wat samewerking tussen gesinne, gemeenskappe, skole, gesondheidsgeriewe, wetstoepassingsagentskappe, die burgerlike samelewing en die regering vereis.

Palema het gesê verbeterde datastelsels, wat sedert 2020 deur middel van elektroniese saakbestuur ingestel is, sal help om nasporing, verwysings en dienslewering te versterk. 

Die ministerie het gesê voortgesette belegging in die kapasiteit vir maatskaplike werkers en betroubare datastelsels is noodsaaklik om te verseker dat kwesbare kinders tydige beskerming en ondersteuning ontvang.

– [email protected]