Winde van verandering

“Hierdie is ’n verskriklike groot eer wat my te beurt geval het. Jy besef weer eens jou kleinheid voor die Here. Ek staan steeds in verwondering voor Hom.”

So het ds. Soraya Mostert-Gertze ná haar verkiesing as die eerste vrouemoderator van die Verenigende Gereformeerde Kerk in Suider-Afrika (VGKSA) gesê.

Sy was ook die eerste vrouedominee in die VGKSA in Namibië.

Ds. Ernitha Shihungu is by dieselfde geleentheid as die streekverteenwoordiger vir die Orumana/Oshakati-ring verkies.

Beide sê hulle moes hard werk om hul bekwaamheid te bewys, maar volgens Mostert-Gertze is “harde werk ons vroue se sleutel”.

Mostert-Gertze het tydens haar meestersgraad juis die vroue in die Ou Testament bestudeer en sê sy voel sy moet juis nou “terugkyk na haar medevroue”.

“As ons vroue moet voor loop, kan ons dalk dinge op ’n sagter manier doen,” het sy gesê.

Sy sê sy het voor sy tot die bediening geroep is, besef dat sy hard moes werk indien sy haar plek in die kerkgemeenskap wou uitkerf.

“Ek onthou met tye wou my kerkraad my nie stuur om bedieningswerk op ander plekke te gaan doen nie omdat ek ’n vrou is, maar ek het besluit ek gaan almal wys – juis omdat ek teenkanting gekry het,” het sy gesê.

Mostert-Gertze onthou die togas van leraars in die Gereformeerde Kerk het haar sedert haar laerskooldae in vervoering gehad. “Onderwysers het altyd gevra wat jy wil word en ek onthou my Afrikaansonderwyser het een keer opgemerk hoe uniek dit was dat ek gesê het ek wou ’n dominee word,” het sy gesê.

SHIHUNGU

Shihungu sê haar pad na die bediening was effens moeiliker weens haar biologiese pa se afwesigheid tydens haar kinderjare.

“Ek is deur ’n enkelma grootgemaak en ek onthou ek het altyd gevra oor die feit dat ek nie regtig oomblikke saam met my biologiese pa kon onthou nie.

“Daarom het ek besluit ek wil die Here dien en na ander se stories luister asook vertroosting bied en hulle ondersteun,” het Shihungu gesê.

Sy het in die Shighuru-nedersetting in die Kavango-Oosstreek grootgeword en sê haar eerste besoek aan die hoofstad het gevoel asof sy in ’n vreemde land is.

Shihungu het haar baccalaureusgraad in Namibië voltooi voor sy haar honneursgraad en meestersgraad in teologie onderskeidelik aan die Universiteit van Suid-Afrika en die Universiteit van Pretoria voltooi het.

Voor sy egter die bediening nagestreef het, het Shihungu volwassenes onderrig.

Mostert-Gertze sê dit is juis haar geloof wat haar deur onseker tye gedra het voor sy haar studies in teologie aan die Universiteit Stellenbosch voltooi het.

Soos Shihungu was Mostert-Gertze se pad tot die bediening nie reguit nie.

“My pa was ’n sakeman en ons het sy besighede as kinders bestuur. Ek het drie jaar ná matriek vir hom gesê dit is nie wat ek wil doen nie en vandaar af het alles net in plek geval vir my studies,” het sy gesê.

Selfs toe die finansiële verknorsing druk, vertel Mostert-Gertze het die Here vir haar die pad gelyk gemaak.

“Die Here het toe ek op universiteit was op bonatuurlike maniere gewys wie is in beheer. Ek het twee pryse gewen wat vir my studies betaal het en een keer was daar selfs kleingeld oor,” sê sy.

WAARDES

Shihungu sê geslagsgebaseerde geweld is een van die kwessies wat haar na aan die hart lê.

“Ek dink dit is een van die groot kwessies wat die samelewing raak. Ek wil die vroue wat slagoffers is aanmoedig om te praat, want niks gaan verander as hulle nie praat nie,” het sy gesê.

Sy hoop ook om bewustheid te skep vir mans wat slagoffers van geslagsgebaseerde geweld is.

“Dis nie net vroue nie, mans word ook hierdeur geraak en omdat die samelewing vir mans sê hulle mag nie huil nie en hulle moet sterk wees, kry hulle nie die ondersteuning wat hulle nodig het nie.

“Ek dink nie hierdie pas by die Bybelse beeld van ’n godsdienstige man nie. Ons sien in die Bybel die Here het self gehuil toe sy vriend dood is,” het Shihungu gesê.

Mostert-Gertze sê sy wil graag bande met ander kerkdenominasies smee.

“Ek wil veral ons bande met die NG Kerk versterk. Die Bybel sê waar twee of meer in Sy naam vergader, is hy teenwoordig. Ek is nie onsensitief teenoor die verlede nie, maar ek dink dit is nou die tyd dat ons mekaar se rowe aftrek en pleisters opplak eerder as om nog klippe te probeer gooi wanneer die oorloë reeds gewen is,” het sy gesê.

Mostert-Gertze beskryf haarself as ’n “liberale” leraar en sê sy wil graag gehoor gee aan die jonger geslag se oplossings vir die knaende probleme in die wêreld.

– [email protected]