Wêreldverhoog wink vir plaaslike sjef

Namibië word vanjaar die eerste keer by die Global Chefs Challenge verteenwoordig.Dié eer val Elizabeth Isai (22) van die Namibië Universiteit van Wetenskap en Tegnologie (Nust) te beurt wat deur die Namibiese Sjefsvereniging (NamChefs) ondersteun word.Elizabeth se Duitse pa, Albert Brandhuber, het haar van kindsbeen af die passie vir kosmaak aangeleer.“My pa het altyd vir die familie en die gemeenskap gekook, en ek wou nog altyd graag soos hy wees,” het sy gesê.Dit is die tweede keer dat sy die wêreldverhoog in Sharjah in die Verenigde Emirate (VAE) sal betree. Elizabeth neem op 29 en 30 Mei in die kategorie vir jongmense deel, saam met deelnemers van Suid-Afrika, die VAE, Egipte en Katar. “Ek is opgewonde en terselfdertyd ’n bietjie op my senuwees om deel te neem. Ek is ook baie gelukkig,” het sy oor haar deelname gesê. Ralf Hergott, Elizabeth se mentor, sê die ouderdomsbeperking vir die kompetisie is 25 en sy het gekwalifiseer deur as junior sjef van die jaar aangewys te word, ’n kompetisie wat die sjefsvereniging aanbied. “Elizabeth is ’n baie spesiale geval. Haar pa het na my uitgereik sodat sy kursusse kan doen,” sê Ralf. Hy het verder gesê sy het baie goed in haar kort kursusse by Nust gevaar.Sy het verlede jaar die beste in haar kategorie gedoen by die jaarlikse Wordskills Africa-kompetisie en het die geleentheid gekry om Namibië in Switserland te verteenwoordig. Sy het drie punte gekort om ’n medalje te wen. “Ek het baie geleer. Wordskills was ’n goeie platform om my vaardighede op te skerp,” sê Elizabeth.Sy was ook deel van die span wat in Mei verlede jaar aan die Afrika Kulinêre Beker deelgeneem het waar haar span vierde plek behaal het.Vir die Global Chefs Challenge moet Elizabeth ’n voorgereg, hoofgereg en nagereg in drie ure voorberei vir vier mense. As sy die kompetisie wen, staan sy die kans om in Oktober 2024 in Singapoer deel te neem. Die sjefsvereniging borg Elizabeth se vliegtuigkaartjie sowel as sakgeld vir haar en Ralf. Nust verskaf die gebruik van die geriewe by die hotelskool. Sy het voorheen nie in haarself geglo nie en kon haarself nooit indink dat sy so goed in al haar kompetisies sou vaar nie.“Ek beplan om eendag my eie kulinêre skool oop te maak en terug te gee vir die gemeenskap,” sê Elizabeth oor haar toekomsplanne. – republikein@republikein.com.na

Wêreldverhoog wink vir plaaslike sjef

Kommentaar

Republikein 2025-12-15

Meld asseblief aan om kommentaar te lewer

Wêreldverhoog wink vir plaaslike sjef

Kommentaar

Republikein 2025-12-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.