Vroue vorder in mynbou

Die Namibiese Vereniging vir Vroue in Mynbou (WiMAN) het Vrydag sy nuwe mentorskapprogram vir 2025 in die hoofstad bekend gestel. Op Sondag 15 Junie is die Internasionale Dag vir Vroue in Mynbou herdenk.Volgens WiMAN maak vroue slegs 15% van die arbeidsmag in die mynbousektor in Afrika suid van die Sahara uit. Die program hoop om die wanbalans tussen mans en vroue in die sektor te takel deur vroeë loopbaanondersteuning vir vroue in mynbou te bied, mentorskap, afrigting en geleenthede om leierskap te ontwikkel. Oor die volgende drie jaar beoog WiMAN om volhoubare kanale te skep waardeur vroue in mynbou bevorder sal word, met voormalige studente was as mentors terugkeer om ’n langtermyn-impak te verseker.Zenzi Awases, die president van WiMAN, het tydens die geleentheid gesê onbewuste vooroordeel teenoor vroue in mynbou bly een van die grootste struikelblokke. Vrouemynwerkers word selde op bestuursvlak van mynorganisasies teëgekom, meen sy. Vir haar, as iemand met amper twee dekades ervaring in mynbou, is die probleem iets persoonlik, sê sy. “Wanneer vroue opstaan, ontwikkel nywerhede, wanneer jongmense geïnspireer word, floreer nywerhede,” sê Awases.Die beskermvrou van WiMAN, die voormalige adjunkminister van myne en energie en die huidige spesiale adviseur in die president se kantoor, Kornelia Shilunga, het die mentorskapprogram amptelik van stapel gestuur.Sy sê ten spyte daarvan dat slegs een uit elke vyf werksgeleenthede in mynbou in Namibië deur vroue gevul word, Namibië reeds ’n voorloper in vrouegelykheid is.“Hierdie is die dekade van vroue in mynbou,” het Shilunga aangevoer. Sy meen daar is geen werklike vordering tensy dit vroue insluit nie. Sy prys die program wat volgens haar struikelblokke sal takel, insluitend toegang tot finansiering, tegniese opleiding, werkpleksekuriteit en sigbaarheid van vroue in mynbou. “Jy kan nie word wat jy nie kan sien nie,” sê Shilunga, en voeg by, “elke vrou wat deur hierdie program bemagtig word, sal nog 'n leier vir Namibië word”.Die uitvoerende direkteur van nywerheidsontwikkeling, myne en energie, Ben Nangombe, het beaam dat die aantal vroue in mynbou in Namibië nie genoeg is nie “en dat meer gedoen moet word”. Volgens hom bly mynbou een sektor waarin geslagsverskille meer opvallend bly. “Talle Namibiese vroue het die kwalifikasies en die dryfkrag om in mynbou te floreer.“Mynmaatskappye moet aangemoedig word om doelbewuste pogings aan te wend om vroue aan te stel, te bemagtig en regverdig te beloon,” sê hy.Hy sê vroue sal die ontwikkeling van waardetoevoeging en verkrygingswaardekettings aanspoor. Maatskappye wat deur vroue besit word en by mynbou betrokke is, moet ook bemagtig word, volgens Nangombe. Hy noem die mentorskapprogram die eerste van sy soort in Namibië, grondverskuiwend en iets wat 'n positiewe impak sal maak. “Hierdie gestruktureerde benadering is belangrik om die struikelblokke te oorkom,” sê Nangombe.John Sisay, die medestigter en uitvoerende hoof van Consolidate Copper Corporation was ook aan die woord. Consolidate Copper het die aanvanklike finansiering verskaf om die program van stapel te stuur. “Stel vroue aan,” het hy gesê. “Wanneer vroue betrek word, is daar onmiddellike voordele, asook vir die hele samelewing,” sê hy. “Ons weet almal dat vroue net so bekwaam soos mans is, maar om die dinamiek te verander, moet ons proaktief wees,” sê hy. Volgens Awases het WiMAN sowat N$3,5 miljoen nodig om al die planne vir die mentorskapprogram uit te kan voer. Sy doen ’n beroep op die mynbedryf om hierdie fondse beskikbaar te stel. Volg die skakel na die video by q.my.na/TPDK.– augetto@nmh-hub.com.na

Vroue vorder in mynbou

Kommentaar

Republikein 2025-06-17

Meld asseblief aan om kommentaar te lewer

Vroue vorder in mynbou

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie