Van Grootfontein tot die internasionale verhoog

Birke Thümer (née Gressmann) is Vrydag by die International Speaker Slam naby Wiesbaden in Duitsland met die gesogte Internasionale Sprekerstoekenning bekroon. Birke, gebore en getoë op Grootfontein, se bekroonde toespraak het gehandel oor die maatskaplike belang van gesonde, ekologiese en volhoubare argitektuur. Birke werk as argitek by die Bodensee in suidelike Duitsland, waar sy haar onderneming Thümer Holzbau Architektur bestuur. Sy is ’n argitek, meester-skrynwerker, boubioloog en beoordelaar van bouskade. In haar werk verbind sy argitektoniese beplanning, houtkonstruksie, praktiese materiaalkennis en ’n diep begrip van gesonde leefruimtes. Die grondslag vir hierdie pad is op Grootfontein gelê waar Birke in die Laerskool Wilhelm Nortier was. Volgens haar was sy die eerste meisie by die skool wat toegelaat is om houtwerk as vak te neem. Tot op daardie stadium kon meisies net naaldwerk neem om te leer hekel en brei, terwyl houtwerk slegs vir seuns was. Hierdie stap is destyds moontlik gemaak deur die skoolhoof, Landman van Greunen. Vir Birke was dit ’n bepalende oomblik: Vir die eerste keer kon sy met hout werk – ’n materiaal wat later die goue draad deur haar hele beroepslewe sou word. Haar pad het haar uiteindelik van Namibië na die ambag – van houtwerk na meesterskap en uiteindelik na argitektuur gelei. Vandag beywer sy haar vir gesonde, ekologiese en volhoubare geboue. In die kern van haar werk staan die oortuiging dat geboue baie meer as fisiese strukture is. Birke meen geboue beïnvloed hoe mense leef, slaap, asemhaal, werk en op die lang termyn gesond voel. Die spreker-afrigter en organiseerder, Hermann Scherer, het Birke se toespraak ass uitstekend beskryf, “omdat dit uiteindelik duidelik maak watter groot bydrae gesonde konstruksiewerk tot ons samelewing lewer”. Vir Birke is die toekenning nie net ’n persoonlike prestasie nie. Dit is ook ’n bevestiging van ’n pad wat op Grootfontein begin het en van houtwerk na argitektuur en uiteindelik tot op ’n internasionale verhoog gelei het. Haar kernboodskap is duidelik: “Die manier waarop ons bou, help bepaal hoe ons leef.” – republikein@republikein.com.na

Van Grootfontein tot die internasionale verhoog

Kommentaar

Republikein 2026-08-26

Meld asseblief aan om kommentaar te lewer

Van Grootfontein tot die internasionale verhoog

Kommentaar

Republikein 2026-08-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.