Uitdaging word 13-jarige se besigheid

“Hierdie was aanvanklik ’n uitdaging wat my ma vir my gegee het en nou geniet ek dit so baie dat ek hoop die besigheid groei,” het die 13-jarige Charles Kandingua van Charles Cleaning Services in Windhoek gesê.

Charles het aanvanklik sy ma se selfoon gebruik om in buitelandse valuta handel te dryf.

“My ma het gesê ek kan nie altyd ander mense se fone gebruik nie en met my ’n ooreenkoms aangegaan. As ek N$1 000 binne 100 dae kan maak, sal ek my eie foon kry sodat ek kan verhandel.”

Charles het idees met sy tannie en oom uitgeruil.

“My oom het met die idee vorendag gekom om vullisdromme skoon te maak. Dis iets wat ek in elk geval by die huis doen. Ek het ook besluit om dienste aan te bied om mense se erwe skoon te hark en om die plaveisel te was en skoon te vee.”

Charles het ’n maand gelede sy besigheid op die been gebring en het reeds N$450 gemaak. Hy vra N$30 per vullisdrom, en N$50 elk vir die vee- en harkwerk.

“Ek bied my dienste regoor Windhoek aan. Ek kan dit egter net oor naweke doen omdat ek nog op skool is.”

Charles sê hy geniet sy besigheid en dit hou hom besig en uit die kwaad uit.

“Vir al die ander jongmense daar buite wil ek net sê: Doen iets, begin iets. Moenie net op jou ouers staatmaak om geld te kry nie. Doen iets, eerder as om te wag dat dinge na jou kant toe kom.”

Charles Cleaning Services se dienste kan by 081 346 2706 geboek word.

- [email protected]