Trou is nie perdekoop nie

“Belê in ’n koningsgrootte bed,” is die raad wat Wayne Solomon aan sy jong, ongetroude self sou gee.Wayne en vroulief, Siobhan, is in 2017 as Republikein se bruidspaar van die jaar aangewys.“Vertrou my, jou toekomstige self sal jou bedank wanneer daar kinders, troeteldiere en allerlei speelgoed by julle aansluit in die middel van die nag,” verduidelik Wayne.“En leer dat ‘fine’ nooit regtig ‘fine’ beteken nie. En belangriker, maak seker dat julle altyd saam bid,” sê hy verder.Mariaan van Greunen, wat saam met haar man, Roland, in 2018 die titel gewen het, deel ’n soortgelyke sentiment as Wayne.“‘Dis reg’ en ‘maak soos jy wil’ beteken glad nie wat jy dink dit beteken nie,” waarsku sy.Die Solomon-egpaar deel dat daar ag geslaan moet word aan die ou Afrikaanse gesegde “trou is nie perdekoop nie”.“Die huwelik is nie iets wat jy ligtelik moet opneem nie. Dit strek jou uit, daag jou uit en verg daaglikse inspanning. Maar deur die beproewings, as julle regtig na mekaar luister en die werk insit, kom julle sterker anderkant uit,” sê Siobhan.Wayne sê hy het in sy huwelik met Siobhan nie net die verskil tussen “hoor” en “luister” geleer nie, maar dat ’n paar ander waardevolle lesse van hom ’n beter eggenoot gemaak het. “Die huwelik het my geleer om reg te wees is nie so belangrik as om mekaar te verstaan nie. Dit gaan nie oor telling hou nie, dit gaan oor saam groei, selfs wanneer dit ongemaklik is.“En eerlikwaar, ek het geleer dat sonder God se genade, ons nie die wysheid, geduld of krag sou hê om dit goed te doen nie.”Mariaan waarsku teen onrealistiese verwagtinge wat vir jong getroude paartjies geskep word.“Ons eerste jaar was nie ’n wittebroodfase nie en moenie dat mense met jou kop smokkel met onrealistiese verwagtinge nie.“Dit neem tyd om in die vloei van ’n huwelik in te kom, so vat julle tyd, maar oor die jare het ons besef ons is eintlik ’n fantastiese span, solank ons albei genoeg slaap, kos en drukkies kry.”Albei paartjies deel dat liefde alleen nie ’n huwelik in stand kan hou nie.“Liefde alleen is nie genoeg nie. Jy het geduld, grasie en ’n baie goeie sin vir humor nodig.“En moenie op hol raak oor klein goedjies nie, die helfte van die dinge wat in die oomblik groot voel, sal op die lange duur nie saak maak nie,” sê Siobhan.“Liefde is nie net ’n gevoel nie, dis ’n daaglikse keuse – soos om nie al die vet biltong op te eet nie, al is dit reg voor jou in die yskas,” sê Mariaan.– irene-mari@nmh-hub.com.na

Trou is nie perdekoop nie

Kommentaar

Republikein 2026-02-03

Meld asseblief aan om kommentaar te lewer

Trou is nie perdekoop nie

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.