Topregsman groet

Die naam Hennie Barnard het sedert 1967 in hofsale oraloor Namibië weerklink. Die jong prokureur van Stellenbosch het vandat hy in Windhoek as aanklaer aangeland het, sy teenwoordigheid duidelik laat hoor. So is Barnard ook op die ouderdom van 24 as die jongste aanklaer-generaal in die geskiedenis van die destydse Suidwes-Afrika aangestel.Toe hy Sondag op 83-jarige ouderdom in Windhoek oorlede is, het regsgeskiedenis saam met hom stil geword en ’n koue voorwinterbries het waarskynlik oor Bethlehem in die Vrystaat gewaai waar Hendrik Barnard op 17 Maart 1943 gebore is. Hy het op Reitz gematrikuleer.Barnard het op die Universiteit Stellenbosch in die regte gaan studeer waar hy die grade BA. en LLB behaal het. Hy was ’n inwoner van Huis Visser. SPORTMALBarnard was sportmal. Sy seun Gerhard het met sy ondersteuning in sport, veral as wêreldklas-naelloper presteer. Barnard het vir die destydse Westelike Provinsie (WP) geboks en selfs een keer “van die bank af” vir die WP se gevierde rugbyspan uitgedraf. In Windhoek was hy ’n senior lid van die Wanderers-sportklub en natuurlik altyd langs die sportvelde waar al sy kinders uitblinkers was. Hennie was getroud met Hanneke (Van den Berg) en die pa van drie seuns, Gerhard, Bennie (reeds oorlede) en Hendrik (jr.), en ’n dogter, Leanri.Barnard het sy loopbaan in die staatsdiens beëindig en in 1972 saam met Leslie Stern die regsfirma Stern &amp; Barnard begin. Meer as 20 later in 1996 het hy die regsfirma Hennie Barnard &amp; Partners begin. Gerhard, wat in sy pa se voetspore as regsgeleerde gevolg het, beskryf sy pa as ’n uitmuntende straflitigant van byna 50 jaar, wat ’n vriend en kollega van regslui, ondersoekbeamptes, landdroste en regters was. “Hy het uitstekend saam met sy prokureurs- en advokate-kollegas gewerk.”Barnard het hom met regskwessies besig gehou, maar menige kwaaddoener en onskuldige sal vandag getuig dat dié geesdriftige regsman hulle redding of ondergang in ’n hof beteken het. Tog was die man wat as ’n hardekwas prokureur beskryf is, ook in aanraking met ’n sagter sy van die lewe. Hy het graag geskryf, baie gelees, gesing en klavier op gehoor gespeel en hy was tot laat in sy lewe mededingend in sportsoorte soos sosiale krieket, snoeker, veerpyltjies en tafeltennis.“Hy was ’n man van inbors en integriteit, onwrikbaar lojaal en ’n gesinsman,” het Gerhard oor sy legende van ’n pa gesê.– republikein@republikein.com.na

Topregsman groet

Kommentaar

Republikein 2026-06-10

Meld asseblief aan om kommentaar te lewer

Topregsman groet

Kommentaar

Republikein 2026-06-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.