Suzetjie sal sy Suzetjie bly

Suzetjie, die kat, is onlangs met die hulp van Have-a-Heart gesteriliseer, net om uit te vind dat Suzetjie eintlik ’n mannetjie is. Dit maak egter nie saak vir sy eienaar Michael Tsei-Tseimou nie, vir wie Suzetjie, Suzetjie sal bly. Michael het vir Anne Fleidle van Have-a-Heart Namibia gekontak en gevra of dié dierewelsynsorganisasie vir Suzetjie kan steriliseer.“Natuurlik help ons graag. Ek het met die veearts van Windhoek Animal Hospital gereël en Michael het vir Suzetjie gebring,” het Anne gesê.Michael sê hy het Suzetjie by ’n kollega gekry wat baie katjies in sy erf het. “Ek wil nie hê Suzetjie moet ook babas kry nie, daar is reeds so baie babatjies. So ek het haar in die katboks gelaai, dit agter op my fiets vasgemaak en van my huis in Goreangab na Khomasdal gery, waar sy kom haal is. Die mense langs die pad het gedink die kat agterop my fiets is baie snaaks. Veral die kinders was baie nuuskierig oor ons twee,” het Michael gesê. Die veearts het agtergekom Suzetjie is eintlik ’n mannetjie. Michael het net daar besluit dit verander niks nie en Suzetjie sal sy Suzetjie bly. “Suzetjie bly dieselfde katjie waarvoor ek baie, baie lief is.”Michael het voorheen vir Kietzie gehad wat hy ook by ’n vriend gekry het. “Kietzie en my hond, Stompie, was baie goeie vriende. Hulle het saam grootgeword, saam uit een bak geëet en saam geslaap. Toe Kietzie oud geword het, het hy in 2018 net weggeloop en dit was vir my baie seer. Ek het later gehoor as katte oud is dan loop hulle weg. Stompie het ook dieselfde tyd weggeloop. Dit is eers nou – toe ek vir Suzetjie gekry het – dat ek vrede gevind het. Sy het my hart bly gemaak en vrede gebring.”“Ek het verlede jaar by die ministerie van onderwys in Khomasdal ’n mammakat en haar vier babas vir Have-a-Heart gevang. Michael werk daar en het Have-A-Heart onthou toe Suzetjie nou reggemaak moes word en ons gekontak. Baie dankie Michael dat sy so ’n liefdevolle en verantwoordelike troeteldiereienaar is en baie dankie aan al die mens wat Have-a-Heart ondersteun sodat ons in ruil weer mense soos Michael kan ondersteun en help,” het Anne gesê. – tanja@republikein.com.na

Suzetjie sal sy Suzetjie bly

Kommentaar

Republikein 2025-05-13

Meld asseblief aan om kommentaar te lewer

Suzetjie sal sy Suzetjie bly

Kommentaar

Republikein 2025-05-13

Meld asseblief aan om kommentaar te lewer

MELD AAN

Advertensie