Soos ’n vis in die water

“Ek was baie trots en dit het so ongelooflik gevoel. Ek was baie bly dat ek aangehou het om myself te druk en nooit opgegee het nie,” vertel Caitlin Botha (26), ’n Paralimpiese swemmer. Die 26-jarige Windhoeker het pas uit Frankryk teruggekeer, waar sy vier Paralimpiese Afrika-rekords tydens die City Para World Series-byeenkoms opgestel het. In haar kategorie vir serebraal gestremdes is sy reeds die kontinentale rekordhouer vir die 50 en 100 meter rugslag en het in Frankryk die rekords vir die 50 vlinderslag, 50 en 100 vryslag asook 200 individuele wisselslag bygevoeg. Volgens haar afrigter Adriaan Maritz het hy Caitlin vir die 50 vlinderslag ingeskryf, maar het nie veel verwag nie.“Ons is ingelig volgens haar klassifikasie dat sy nie vlinderslag kan swem nie, omdat sy nie die tegniese aspekte van die styl het nie. Daar is gesê sy sal net gediskwalifiseer word. “Ek het haar wel in Frankryk ingeskryf met die hoop dat mense vir my agterna raad kan gee oor hoe ons kan verbeter. Ek het haar in die water gekry en weggestap, omdat ek regtig gedink hy sy gaan gediskwalifiseer word. “Groot was die verrassing toe ek ’n WhatsApp kry met ’n boodskap wat sê langs Caitlin se naam staan AR – wat Afrika-rekord beteken. Die item wat ons gereken het sy nie kan swem nie, het vir ons haar eerste Afrika-rekord gegee,” het hy gesê. SWEMHaar ma Aileen Botha het vir haar in die eerste week ná haar geboorte in die swembad gesit. “Sy was nog altyd in ’n swembad. Ek het haar sodra sy kon by swemklasse vir babas ingeskryf. Op sesjarige ouderdom het ek haar by Dolphins-swemklub ingeskryf waar sy vir afrigter Adriaan ontmoet het. Sy is nou reeds 20 jaar by Dolphins.”Aileen het seker gemaak dat Caitlin haar hele lewe deel is van die groter swemgemeenskap en het haar aan elke gala laat deelneem.“Caitlin was altyd die enigste een met spesiale behoeftes, maar nou het Adriaan nóg Paralimpiese swemmers bygekry en ek hoop ons swemmers kan nou meer sigbaar word. “Ons moet ons atlete met gestremdhede beter behandel en Namibiërs moet hul houding teenoor hulle verander. Hulle moet ten volle deel van die samelewing word en as deel daarvan gesien word. Die samelewing moet hulle aanvaar en aanvaar dat elkeen van ons ’n bietjie ‘anders’ is.”CAITLINSy was die eerste persoon met serebrale gestremdheid wat haar matriekeksamens geskryf het. “Sy het die eksamen mondelings afgelê, want om te skryf, sou net te stadig wees.”Aan die begin van die jaar het Caitlin aan die Pointbreak oopwaterswembyeenkoms by Oanabdam deelgeneem. “Sy het 2.7 kilometer sonder hulp voltooi. Sy het vorige jare al 700 meter geswem en ons het besluit om haar uit te daag en te kyk hoe ver ons haar kan druk – en sy het uitstekend gedoen,” het Adriaan gesê. Caitlin sê: “Ek het van die swem by Oanab gehou. Ek was glad nie bang nie, omdat Adriaan naby was. Maar ek hou nog meer van die Parys swem in Parys en ek sal graag wil teruggaan. Ek het baie mense daar ontmoet wat soos ek is en nou weet ek dat ek nie alleen is nie.”Volgens haar is vryslag haar gunsteling swemstyl. Volgende wag die 2023 Paralimpiese wêreldswemkampioenskap in Manchester, waar sy vir die Paralimpiese Somerspele in Parys kan kwalifiseer. “Ons moet haar daar kry sodat sy kan kwalifiseer. Die probleem is egter die finansiering. Ons het al die geld vir die City Para Series in Frankryk self ingesamel. Daar is baie min finansiële steun vir para-atlete, maar ons moet die geld insamel en daarna ook vir die Paralimpiese Spele.”Caitlin sê: “My motto is, moet nooit opgee nie. Die volgende uitdaging is ’n goue medalje by die Spele.”– tanja@republikein.com.na

Soos ’n vis in die water

Kommentaar

Republikein 2026-02-03

Meld asseblief aan om kommentaar te lewer

Soos ’n vis in die water

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.