Soete versoeking

’n Klein stalletjie by die uitgang van Food Lover’s Market in Swakopmund vertel ’n groter storie van volharding van Boebels en oom Jan Verster.

Hier bou hulle elke dag aan hul bestaan met vars, tuisgebakte koeksisters, mosbeskuit en hawermoutkoekies. Die eenvoudige tafel met ’n kokbeeldjie wat hul naam vertoon, het deel geword van die daaglikse roetine van kliënte wat verbybeweeg. Boebels Sweets Enterprises het ook mettertyd deel van die stalletjie geword. 

Oom Jan sit elke dag agter die tafel en verwelkom kliënte. Die klein stalletjie het vir baie gereelde besoekers ’n bekende gesig geword. 

“Mense kom soek oom Jan,” sê sy vrou, Boebels. 

“As ons nie daar is nie, vra hulle waar hy is.”

Die dag begin lank voor sonsopkoms.

Beskuit word in die vroeë oggendure voorberei. Die deeg moet rys; die oond is klein en net ’n paar panne kan op ’n slag gebak word. 

Later volg die koeksisters, vars voorberei vir die dag se verkope. Dis handearbeid – geen masjiene nie, net hande en geduld. Slaap kom in kort rukke tussenin, met ’n wekker wat weer roep wanneer die volgende skof begin.

Volgens Boebels is varsheid hul grootste geheim.

“Dit word elke dag vars gebak,” sê sy. 

“Dis wat mense waardeer.”

Wat as ’n noodsaaklikheid begin het, het geleidelik in iets meer bestendig verander. Sommige dae is beter as ander en ’n stabiele inkomste word nie gewaarborg nie.

“Elke dag is nie ’n goeie dag nie, maar ons hou aan,” volgens Boebels.

Ten spyte van die uitdagings sê die egpaar die ondersteuning van die gemeenskap en die winkel self het ’n groot verskil gemaak.

By die uitgang van Food Lover’s Market bly die klein tafel elke oggend staan – ’n herinnering dat harde werk, eenvoudige produkte en volharding steeds ’n bestaan kan bou.

– [email protected]