Raar maar waar: Omajova in Junie

Frank van Zyl, ’n boer in die Kamanjab-omgewing kon nie sy oë glo toe hy Woensdag op 45 sampioene (omajova) op ’n miershoop afkom nie.

Dit volg nadat dit die vorige dag erg in die omgewing en op die plaas Louwsville gedou het.

“Kan jy dit glo – sampioene in die einde van Junie! Dit het laasnag [27 Junie] baie erg gedou – so erg dat water van die dak af gedrup het – en toe kry een van ons werkers so rondom 14:00 die sampioene op ’n miershoop in die veld,” het Van Zyl vertel. Hy sê sy ma, wat nou 85 jaar oud is, sê sy het ook nog nooit omajova in die winter op miershope sien groei nie.

“Al wat ek kan dink daartoe gelei het, moes die erge dou gewees het,” het Van Zyl gesê en bygevoeg hulle het nog nie erge koue gehad nie, behalwe vir een oggend toe die kwik op minus 1 gestaan het.

Hy sê sy werkers het reeds heerlik aan die omajova gesmul, terwyl hy syne die naweek saam met kuiergaste gaan geniet.

Namibië is bekend vir sy groot, wit sampioene, ook bekend as omajova in Herero, wat gewoonlik aan die begin van die reënseisoen tussen Januarie en Maart hul verskyning op miershope maak.

Sodra dit gegroei het, moet jy dit egter vinnig ontdek, want dit hou nie lank nie en wilde diere soos koedoes is ook bekend daarvoor dat hulle graag daaraan smul.

Omajova, met hul unieke geur en smaak is enorm in vergelyking met sampioene wat in winkels gekoop kan word en word deur termiete gekweek. Die wetenskaplike naam vir die sampioene is Termitomyces.

Gewoonlik – sodra die eerste reën val, verskyn vlieënde termiete wat in groepe migreer om hul eie kolonies te vorm. Die vlieënde termiete word ook deur sommige kulture geeët.

– [email protected]