Persvryheid ‘n integrale deel van demokrasie, sê Gwen

Me. Gwen Lister - die Namibiese persvryheidskampvegter, mediabaanbreker en veteraanjoernalis - het die afgelope Woensdag, 1 Junie, die eretoekenning van die Duitse Afrika-stigting (DAS) ontvang vir haar werk as joernalis gedurende die apartheidsera, asook vir haar uitsonderlike toewyding tot die bevordering van persvryheid. In haar aanvaardingstoespraak het Lister, die voorsitter van die Namibië Mediatrust, die kwesbaarheid en waarde van goeie joernalistiek beklemtoon. “Joernalistiek en joernaliste regoor die wêreld is in gevaar. Miskien nou meer as ooit vantevore. Net so is demokrasie ook in gevaar as ons nie daarin slaag om die volhoubaarheid en veiligheid van albei te verseker nie,” het sy gesê. “Ek aanvaar hierdie toekenning in die hoop dat dit aandag sal vestig op die stryd om joernalistiek te red en aanklank moet vind, nie net by burgers regoor die wêreld nie, maar by regerings wat ook meer as blote lippediens moet doen om die voortbestaan daarvan te verseker. “Terwyl die media eksterne sowel as sy eie interne uitdagings in die gesig staar, waaronder om die publiek se vertroue terug te wen deur standaarde van etiek, akkuraatheid en regverdigheid te verbeter, is dit onvermydelik dat demokrasie in die donker sal sterf sonder goeie joernalistiek wat kan, het en steeds dinge ten goede verander,” het sy bygevoeg.Volgens Lister het nuwe bedreigings vir goeie joernalistiek kop uitgesteek. “Dit sluit lewensgevaarlike uitdagings vir volhoubaarheid; die vinnige verspreiding van waninligting - vererger deur die digitale beleg; die Covid-pandemie; en die inval in Oekraïne waar die waarheid reeds ‘n slagoffer van oorlog geword het - met gevolge wat wyd en syd gevoel word,” het sy gesê.Lister het aangevoer ander fundamentele regte is sáám met persvryheid in gedrang. “Ons moet die pers beskerm sodat die pers demokrasie kan beskerm. Op hierdie oomblik het dit al die hulp nodig wat dit kan kry.”DAS gee al sedert 1993 dié toekenning aan individue vanaf Afrika wat ‘n spesiale bydrae tot die bevordering van demokrasie, vrede, menseregte, volhoubare ontwikkeling, kuns of kultuur gelewer het. Vorige ontvangers sluit in mnr. Daniel Bekele (Ethiopië), me. Ilwad Elman (Somalië), me. Juliana Rorich (Kenia) en me. Thulisile Madonsela van Suid-Afrika. augetto@republikein.com.na

Persvryheid ‘n integrale deel van demokrasie, sê Gwen

Kommentaar

Republikein 2026-02-03

Meld asseblief aan om kommentaar te lewer

Persvryheid ‘n integrale deel van demokrasie, sê Gwen

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.