’n Reis van oorlewing

Christelle Potgieter se debuutmemoir, Dosed and Exposed: A Journey of Survival, is nie maklike leesstof nie – en dit probeer ook nie wees nie.Dis ’n eerlike, soms ontstellende, maar uiteindelik kragtige verhaal van ’n vrou wat besluit het om haar storie weer haar eie te maak.Vir Christelle was die besluit om haar verhaal te vertel nie net persoonlik nie, maar ook doelgerig. Sy sê haar ervaring van trauma, verslawing en oorlewing het uiteindelik ’n groter betekenis gekry.“Ek het besef my storie is nie net myne om alleen te dra nie,” verduidelik Christelle. “Ek wou hê ander vroue – veral dié wat vasgevang of onsigbaar voel – moet hulself daarin kan herken en weet hulle is nie alleen nie.”Die boek neem lesers terug na ’n kinder- en vroeë volwasse lewe gekenmerk deur verwerping, verwaarlosing en onsekerheid. Om hierdie emosies neer te pen, was moeilik vir haar.“Om weer deur daardie trauma en emosionele pyn te werk, was uitputtend, maar nodig,” sê sy. Tog het die proses haar gedwing om haar eie veerkragtigheid raak te sien – selfs in tye toe sy nie sterk gevoel het nie.Haar loopbaanpad – van die toerismebedryf tot ’n eksotiese danser – het haar op maniere gevorm wat sy eers later ten volle sou verstaan. In omgewings waar sy dikwels beoordeel of geobjektiveer is, moes sy vinnig leer hoe om mense te lees en haarself te beskerm.“Dit was oorlewing op elke vlak – fisies, emosioneel en finansieel,” sê Christelle.“Dit het my oor geleer grense, selfbewustheid en hoe om strategiese besluite te neem.”Daar was oomblikke wat sy as heeltemal hopeloos beskryf – veral tydens tydperke van haweloosheid en hospitalisasie. Haar pad terug na herstel het egter nie met ’n enkele groot deurbraak begin nie, maar met klein, daaglikse keuses.“Dit was klein dade van selfversorging, om hulp te soek en elke dag te kies om aan te gaan,” sê sy. “Om weer beheer oor my lewe te neem, selfs in die kleinste dinge.”Verslawing en trauma het ook diep letsels op haar verhoudings gelaat. Sy praat eerlik oor patrone van wantroue, mede-afhanklikheid en isolasie. Met verloop van tyd het haar begrip van intimiteit verander. “Dit gaan nie net oor die fisiese nie, maar oor emosionele teenwoordigheid, eerlikheid en wedersydse respek. “Genesing het begin toe ek my eie waarde begin raaksien het,” sê Christelle.Die skryfproses self was uitdagend. Om openhartig te wees oor ervarings wat sy lank probeer onderdruk het, was emosioneel uitputtend. Tog beskryf sy dit as bevrydend.“Dit was terselfdertyd terapeuties en gestruktureerd. “Ek moes besluit watter dele nodig is om die waarheid te vertel, maar ook om ’n samehangende storie te bou,” verduidelik sy. Selfs tóé was daar twyfel. Sy het haarself gereeld afgevra of sekere gedeeltes nie té persoonlik was nie. Haar maatstaf was eenvoudig: Sal dit iemand anders help? “As dit iemand minder alleen kan laat voel of insig kan gee, het ek dit ingesluit.”Vandag leef sy doelbewus volgens die temas in haar boek – kwesbaarheid, selfdeernis en geestelike praktyk. Sy beskryf kwesbaarheid as ’n nuwe vorm van krag en selfdeernis as die vermoë om jouself te vergewe en groei te kies.Haar siening oor verslawing het ook verander. “Dis nie ’n morele mislukking nie, maar ’n simptoom van trauma en onvervulde behoeftes. “Genesing vra tyd, ondersteuning en deernis.”’n Belangrike deel van haar reis is haar begeerte om ander vroue te help. Die idee dat haar storie iemand anders kan ondersteun, gee betekenis aan haar verlede. “Dit herinner my daaraan dat pyn omskep kan word in iets wat kan bemagtig – vir my en vir ander.”Vir Christelle lê transformasie in iets eenvoudig, maar kragtig: Om elke dag vir jouself op te daag. Dit beteken om grense te stel, nugterheid te kies en jou eie welstand te prioritiseer. Haar raad aan ander is om klein te begin. “Kies elke dag een ding wat jou liggaam, gees of siel voed en bou daarop.”Aan diegene wat vasgevang voel in selfvernietigende patrone, bied sy ’n boodskap van hoop: “Genesing gebeur nie oornag nie, maar elke klein tree vorentoe tel.”Uiteindelik hoop sy dat lesers een kernwaarheid uit haar boek sal leer: Jy word nie deur jou verlede of jou foute gedefinieer nie. Jou storie en jou oorlewing behoort aan jou – en dit is kragtig.”Met die volgende hoofstuk van haar lewe sigbaar, kyk Christelle nou na nuwe maniere om haarself kreatief uit te druk. Sy beplan om haar storie verder deur musiek te vertel – nog ’n manier om emosie, waarheid en genesing met die wêreld te deel.– annemarie@nma.com.na

’n Reis van oorlewing

Kommentaar

Republikein 2026-08-03

Meld asseblief aan om kommentaar te lewer

’n Reis van oorlewing

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.