‘’n Groot boom het geval’

“Hy was maar ’n goeie ou, ’n groot boom het geval.”

So het Gert Grobler van die Hentiesbaai Lions Klub gister oor Bertie Botha (83) gesê wat onlangs oorlede is.

Hy laat sy vrou, Dawn, en vier kinders – Nicky, Joy, Aubrey en Dalene – agter.

Dalene Botha, Bertie se jongste dogter, sê haar pa was ’n stigterslid van die Democratic Turnhalle Alliance (DTA), tans die Popular Democratic Movement (PDM). Hy was ook ’n stigterslid van die Lions Klub op Hentiesbaai en het vir ongeveer 12 jaar op die klub se bestuurskomitee gedien, volgens Gert.

“As ’n pa het hy onvoorwaardelike liefde getoon en hy het die ongelooflike vermoë gehad om die groter prentjie te sien,” vertel Dalene.

Sy en haar pa het graag die wêreld saam verken.

“Hy was baie nuuskierig oor die lewe. . . waar ook al ons gereis het, het hy moeite gedoen om met iemand oor die plek te gesels. Dit was nie net ’n mooi uitsig vir hom nie, hy moes met mense praat,” sê sy.

Dalene sê haar pa het met “’n diep menslikheid en fyn humor na die lewe gekyk”.

Hy was glo baie lief vir kos en mense en het graag edelstene en halfedelstene versamel.

“Ons het hom altyd oor sy ‘klippies’ gespot,” vertel Dalene.

“My pa kon enigiets plant en was altyd besig met sy hande,” sê sy en voeg by haar pa het ’n voorliefde vir visvang en rugby gehad.

Hy het ook graag geprosesseerde vleis soos salami gemaak en was glo tot sy laaste dae ’n ywerige boekwurm.

“Hy sou enigiets lees,” sê Dalene.

HENTIESBAAI

Gert sê wyle Bertie het diep spore in sy gemeenskap getrap. “Hy was deur en deur ’n waghond. Hy het seker gemaak dat dinge op die regte manier gedoen word. Hy het verseker dit wat die Lions doen, word volgens die Lions se grondwet gedoen en hy het die munisipaliteit aanspreeklik gehou en gesorg dat hulle volgens die wet optree,” sê Gert.

Hy het ook gesorg dat verskeie maatskaplike projekte in Hentiesbaai van stapel gestuur word.

“Hy was instrumenteel in die verkryging van grond en die bou van ons dienssentrum,” het Gert gesê.

Hy sê Bertie was ook ’n kernfiguur in die Lions Klub se Nurses on Wheels-projek waar verpleegsters senior burgers by hul huise besoek en versorg.

“Hy het geglo dit was nie nodig om ’n senior burger na ’n ouetehuis te verskuif as jy hulle by hul huis kan versorg en hulle hul menswaardigheid kan behou nie,’ sê Gert.

Bertie het ook glo die Chris de Wet-fonds gestig wat die kostes van medikasie dek vir diegene wat dit nie kan bekostig nie, en het gereeld bygedra tot Hentiesbaai se “toerismevriendelikheid”.

“Ons het bankies en tafeltjies opgerig op die duin waar mense gereeld gaan stap. Tot voor sy dood was hy besig om fondse in te samel om die betontafeltjies en -bankies met tafeltjies en stoeltjies wat uit herwinde plastiek gemaak is, te vervang,” vertel Gert.

’n Diens ter viering van sy lewe sal eerskomende Sondag by die NG Kerk op Hentiesbaai gehou word.

– [email protected]