Motorfietse brul vir water

“As dit nie vir ons vroue en familie se aanmoediging was nie, sou ons nou nog in ons huise gesit en daaroor gedroom het,” het dr. De Witt Oosthuizen (46), ’n noodgeneeskundige wat in Wangaratta in Australië woon, gesê. Hy en sy jarelange vriend van die Sonop-koshuis by Tukkies, dr. Jean Cooper (46), ’n sielkundige wat met bestuurslui van maatskappye in Suid-Afrika werk, het reeds uit Pretoria vertrek om 16 000 kilometer deur 20 Afrikalande aan te pak om geld vir die Direct Transact Foundation se waterprojek in te samel. Die avontuur is gepaslik Expedition H2O gedoop, en sal na verwagting oor drie maande in Madrid, Spanje, tot ’n einde loop.Jean sê dit was nog altyd in sy agterkop om só ’n groot avontuur op ’n motorfiets aan te pak. Dit was egter prakties moeilik vir hom om vir drie tot vier maande nie te werk nie.“Ek doen die meeste van die werk vir Direct Transact en dit is hulle stigting wat by die waterprojek betrokke is. Ek het met hulle gereël dat ek vir drie tot vier maande nie vir hulle kan werk nie. Ek gaan egter die tyd volgende jaar terugwerk en terselfdertyd hul waterprojek ondersteun. Dit het die idee laat ontstaan dat dit prakties moontlik kan wees.”Net voor die motorfietsvervaardiger, Husqvarna, sy 2023 Norden 901 Expedition-motorfiets in Suid-Afrika bekend gestel het, het Jean aan ’n werknemer by sy naaste motorfietswinkel gesê dat hy só ’n motorfiets gaan koop en deur Afrika tot in Europa gaan toer, waar dit vervaardig word.“By die bekendstelling van die motorfiets het hulle seker bietjie gedrink en toe vir die internasionale kêrels van die Suid-Afrikaner en sy planne vertel.“Hulle was so in hul noppies dat hulle sommer aangebied het om die motorfiets te borg. Toe die mense my bel en daarvan vertel, het ek met die idee begin werk. Nadat my vrou gesê het ‘ek moet gaan’, het ek op ’n WhatsApp-groep van vyf van ons koshuisvriende van universiteitsdae geskryf: ‘Boys, kyk wat gaan ek doen.’ ’n Rukkie later het De Witt my gebel,” het Jean gesê. “Nadat ek die boodskap gelees het, het ek vir my vrou gesê ek is baie jaloers op Jean en haar eerste woorde was: “Hoekom gaan jy nie saam nie?’ Ek het eers hierdie kant toe en toe daardie kant toe gewik en geweeg en toe besef dit is ’n eens-in-’n-leeftyd-geleentheid. Dit gaan nie weer gebeur nie,” het De Witt gesê.Hoewel beide mans van motorfietse hou en al in hul eie lande ritte onderneem het, is hierdie die langste rit nóg. Op die ou einde het Husqvarna nie die motorfiets geborg nie, maar dit was die finale stamp wat Jean nodig gehad het. WATERDie Direct Transact Foundation het al 64 reënwatertenks in gemeenskappe in die Warden-omgewing in Suid-Afrika, wat geen toegang tot lopende water het nie, opgerig.“Ons wou nie net vir ons eie plesier gaan nie, maar ook ’n verskil in mense se lewens maak en die waterprojek is perfek. As ons R200 per kilometer kan insamel, is dit R3,2 miljoen, wat genoeg is vir 100 watertenks wat vir 5 000 mense toegang tot water sal gee,” het Jean gesê.“Mens kom op ’n punt in die lewe waar jy jouself afvra: ‘Wat nou?’ Jy het klaar studeer en werk nou. Ek werk al vir 18 jaar in Australië, maar my hele familie in nog in Suid-Afrika. “Ons is bevoorreg genoeg om iets te kan doen wat vir ons lekker is en om nog iets vir ander mense te kan doen, is ’n ongelooflike voorreg,” het De Witt gesê. Expetition H2O se eindbestemming is Spanje en dit is ook ’n droë, warm land wat ’n watertekort in die gesig staar. Australië het ook sy eie waterprobleme en dus is daar simboliek aan die drie lande en water gekoppel. – tanja@republikein.com.na

Motorfietse brul vir water

Kommentaar

Republikein 2025-05-02

Meld asseblief aan om kommentaar te lewer

Motorfietse brul vir water

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie