Kraletjie vir kraletjie ’n meesterstuk

Sorgeloos, sonder om te veel te dink, word die krale deur die naald getrek – tien, twintig, dertig op ’n slag.Dan word die draad gedraai, maar jy kan nog nie lekker uitmaak waarmee hierdie man besig is nie.Drie dae later staan daar ’n halwe rendier wat begin vorm aanneem in wit en deursigtige krale. Wellington Mushonga doen al vir 18 jaar kralewerk in Swakopmund. Met dié projek dink hy nie veel oor hoeveel wit en hoeveel deursigtige krale daar moet wees nie. Maar as hy met ander diere werk waarvoor meer kleure nodig is, moet hy meer tyd insit om presies uit te werk watter kleur kom waar.“Hierdie projek is vir ’n vertoonvenster by ’n besigheid,” vertel hy terwyl hy verder werk. Die werk is al tweede natuur.“Meeste van die werk doen ek op bestelling en ek kry baie ondersteuning van die Swakopmunders. Veral wanneer hulle nuwe dekor vir hulle winkels soek.”Hy vertel hy geniet dit die meeste om Namibiese diere te maak.“Dis iets wat ek ken. Ek het dit al gesien, met my eie oë. En dis iets wat ek weet die buitelanders van hou. Iets wat hulle kan saamvat huis toe nadat hulle hier in ons land gekuier het,” vertel hy.Wellington geniet dit om met sy hande te werk. En hy werk dáár waar die mense kan sien. “As ek dit by my huis maak sal die mense nooit weet hoeveel werk in so ’n projek ingaan nie. Vandag sien hulle my die draad draai, more sien hulle hoe ryg ek die krale en teen die vierde dag begin die projek al vorm kry.”Hy sê hulle ontvang baie ondersteuning van die munisipaliteit, wat plek beskikbaar stel vir die kunstenaars om hulle werk ten toon te stel. “Oral in Swakopmund kan jy kunstenaars sien werk. Dit lok die mense.”Die kralewerk is vir Wellington ’n goeie inkomstebron. “Ek kan kos op die tafel sit en huur betaal. Die lewe is goed. En die werk is lekker.”Wellington kan gevind word in die stegie langs Ackermans in Swakopmund, met ’n glimlag op sy gesig, besig om sy krale te ryg.– republikein@republikein.com.na

Kraletjie vir kraletjie ’n meesterstuk

Kommentaar

Republikein 2025-07-17

Meld asseblief aan om kommentaar te lewer

Kraletjie vir kraletjie ’n meesterstuk

Kommentaar

Republikein 2025-07-17

Meld asseblief aan om kommentaar te lewer

MELD AAN

Advertensie