Koningin van brandrissies wil plaaslike mark verower

“Ek het my eerste brandrissie op negejarige ouderdom geëet en onmiddellik verlief geraak op die smaak, die pittigheid, die hitte, die geur en die gevoel wat dit my gegee het,” het Frieda Vatileni (33) stigter en eienaar van Chilli Queen gesê. Frieda is in Onandjokwe gebore en het op vierjarige ouderdom Oranjemund toe getrek.“My pa het ’n huis op Oranjemund gekry en ons het getrek om by hom te wees.”Sy het preprimêre skool in dieselfde jaar op die dorp begin.“Ek en my tweelingsuster is deel van sewe kinders en ons het in ’n hegte gesin grootgeword. My pa het altyd seker gemaak ons doen baie goed as familie saam. Ek was nog altyd en sal altyd my pa se dogter bly. Toe ek ouer geword het, was my ouer broers altyd oorbeskermend, wat hulle in ’n mate tot vandag toe nog is. Ek het goed op skool presteer. Ek was onafhanklik en bietjie stil en skaam; dis egter nou nie meer die geval nie. Ek het wonderlike kindertye gehad.”Sy het haar laerskoolloopbaan op Oranjemund voltooi en haar hoërskoolloopbaan in Windhoek. Ná graad 12 het sy media- en bedryfsielkunde aan die Universiteit van Namibië (Unam) gestudeer. “Ek studeer tans vir ’n meestersgraad in bemarking en kommunikasie.”CHILLI QUEEN“As kind is ek nie toegelaat om baie brandrissies te eet nie. Ek het eerlikwaar net geweet van die normale rooi en groen brandrissies en gedink dis dit. Nadat ek uitgebreide navorsing gedoen het, het ek geleer dat daar soveel verskillende soorte in die wêreld is. Ek het geleer van die Scoville-skaal en hoe om dit te lees, ek het toe in verskeie brandrissies begin inkoop en selfs saad begin invoer van dié wat nie in Namibië voorkom nie.”In 2019 het sy ’n paar bottels aan haar vriende en familie verkoop en hulle was gek daaroor. Sy het haar brandrissiesouse op sosialemediaplatforms bemark en besef daar bestaan groot belangstelling.“Ek het in 2020 ’n bestelling van 50 kilogram gekry en ek het 50 bottels gehoor. Ek het uiteindelik die kliënt se nommer geblokkeer aangesien dit destyds onmoontlik was en ek het geen idee gehad wat om vir hom te sê nie. Ek is tot vandag toe baie jammer en spyt daaroor.”Sy het begin om aan programme deel te neem wat haar kennis in besigheid verskerp het en sy het ook ’n paar markte bygewoon waar haar produkte al hoe gewilder geword het. “Toe ek die produkte behoorlik begin verpak en nuwe geure bekend gestel het, het winkelbestuurders my begin kontak en my produkte het op die rakke beland.”Frieda plant haar eie brandrissies alhoewel dit nie genoeg is nie en sy moet aankoop om in die aanvraag te voldoen.“Ek het elke resep self uitgedink. Ek het geëksperimenteer totdat ek die suksesvolste en smaakvolste sousresep gehad het. Tans het ek sewe verskillende souse op die mark en ek is besig om met nog geure te eksperimenteer en rond te speel. Sodra ek tevrede met die smaak is, sal ek hulle op die rakke sit, maar dit moet perfek wees.”Vyf-en-negentig persent van Frieda se bestanddele is plaaslike produkte. “Al my produkte is 100% handgemaakte Namibiese produkte wat ek self in my kombuis maak. Ek is ontsettend trots daarop dat ek so ’n gehalteproduk vir die plaaslike en internasionale mark uitgedink het en kan maak.”Frieda maak al haar souse self, maar vir die bottelering, verpakking en aflewerings het sy mense aangestel.NAAMFrieda het eendag – toe haar besigheid nog in sy kinderskoene was – ’n bestelling van haar souse wat nog naamloos was, Rundu toe gestuur. “Ek het nog nie ’n naam gehad nie en nadat die kliënt met die souse gekook en dit geproe het, het hy my gebel en gesê: ‘Jy is sowaar die koningin van brandrissies’. Dit is toe ek besluit het om my produk Chilli Queen te noem.”“Ek is oortuig daarvan ek kan die besigheid so laat groei dat my kinders en kleinkinders eendag dit nog kan doen. En wat is beter as my kleinkind eendag in die winkel instap en na die Chilli Queen-bottels wys en sê: “Kyk, dit is my ouma se gesig op die bottel”. Dis hoekom ek besluit het om my gesig op die bottel te sit. Baie mense wat ek vir die eerste keer ontmoet, sê my gesig lyk bekend, omdat ek in hul yskas is en dit laat my goed voel.”TOEKOMS Frieda wil teen die einde van 2028 tussen 10 en 20 present van die mark in brandrissiesouse en -produkte in Namibië besit. “Ek droom om veral meer Namibiese vroue in diens te neem, welvaartskepping te verhoog en die waardeketting te versterk. Ek droom om al my brandrissies self te kan voorsien. Ek het reeds ’n stukkie grond gekoop sodat ek dit kan begin aanplant en aan myself kan voorsien. Ek droom daarvan om onder die top-5 voorste brandrissiehandelsmerke in die land te wees, waar mense Chilli Queen bo enige ander brandrissiesouse verkies. Ek wil ook graag vennootskappe met komplementerende produkte aangaan, om meer en groter toerusting aan te koop sodat ek baie meer kan vervaardig. Ek sien my produkte op rakke buite Namibië.”RAAD“As jy werklik ’n besigheid wil laat werk, vertrou jou instinkte en begin net. Sit die werk in, kry mentorskap, skryf in vir sake- en beginnersprogramme en kom aan die gang. Dit sal nie altyd glad verloop nie en ek weet dit klink soos ’n cliché, maar moet nooit moed opgee nie. Glo in jouself, glo in jou vermoë om dinge gedoen te kry. Kom ons plaas Namibiese produkte op die wêreldkaart, ons is in staat en ons kan.”

Koningin van brandrissies wil plaaslike mark verower

Kommentaar

Republikein 2026-02-03

Meld asseblief aan om kommentaar te lewer

Koningin van brandrissies wil plaaslike mark verower

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.