Knortjor-renjaer gee wengeld aan fonds

Dit was ietwat buite die gewone toe ‘n Nederlandse seun op 13 Augustus aan die 5de been van die National Go-kart Championships op die Tony Rust-baan buite Windhoek deelgeneem het.Daan van Dam (9) was saam met sy ouers, Maarten en Esther, met vakansie in Namibië. Aangesien hy ‘n kranige knortjor-renjaer in Nederland is, het hulle vooruit met die plaaslike knortjor-gemeenskap geskakel om te kyk of Daan ook bietjie hier kan ry. Dit blyk toe dat daar in die tyd wat die Van Dams in die land is, ‘n wedren in Windhoek gehou word. Dadelik is reëlings getref dat Daan kon deelneem.Die kranige jong man het skitterend presteer en tweede in sy klas geëindig. Dit was juis die manier waarop hy sy wengeld bestee het wat gewys het watter bloed in sy are loop.Sewentien jaar gelede was sy oupa en ouma, Gideon en Tineke van Dam, ook in Namibië. Gideon is ‘n predikant wat nou gemoeid was met die versorging van predikante. Hy was juis besig met ‘n reeks werkwinkels in dié verband toe hulle in ‘n ernstige motorongeluk buite Rehoboth betrokke was. Gideon het ernstige beserings aan sy gesig opgedoen wat hom amper sy sig gekos het. Hy kon ’n mate van sig behou deur die knap ingryping van onder meer dokters Egeria Olivier, Jannes Brand en Werner Koepp.Om sy dankbaarheid te betoon, het Gideon besluit om die uitbetaling van die Namibiese Padongelukfonds te organiseer as noodfonds vir hulp aan veral kinders wat nie andersins geholpe kan raak met oogchirurgie nie. Hy het die NG Kerk Namibië gevra om die administrasie van die Bright Sight Namibia-fonds (BSN) te bestuur. Verskeie jong pasiëntjies het al voordeel uit BSN getrek.Dieselfde diensbaarheid van Gideon blyk nou ook in sy kleinseun te leef. Daan het besluit dat sy prysgeld, N$750, aan BSN oorbetaal moet word. Die appel het beslis nie ver van die boom geval nie.Skenkers wat wil bydra tot BSN, of mense wat hulp uit die fonds benodig, kan die NG Kerk se Sinodale kantoor in Windhoek by ngkn@ngkn.com.na kontak. – republikein@republikein.com.na

Knortjor-renjaer gee wengeld aan fonds

Kommentaar

Republikein 2026-01-14

Meld asseblief aan om kommentaar te lewer

Knortjor-renjaer gee wengeld aan fonds

Kommentaar

Republikein 2026-01-14

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.