Jonges se lyne van fantasie

Henriette Lamprecht - Sy moedertaal “drup van sy lippe af” wanneer hy skryf, gesels en sosialiseer. Dit is sy trots en sy herkoms, sê die 19-jarige Armand van Wyk wat pas sy eerste skryfprojek, Lyne van Fantasie, die lig laat sien het. In die projek het Armand kragte met verskeie jong digters saamgesnoer om ’n versameling skryfsels te kies wat wys ons jong digters kán skryf. “Ons doelwit is om vir die ouer Afrikaanssprekende garde wat glo ons skeep ons taal af, die teendeel te bewys,” vertel Armand. Volgens hom wou hy Lyne van Fantasie op skool al as ’n projek aanpak. Die saadjie vir die bundel is geplant nadat hy goeie terugvoer gekry het vir ’n toneelstuk wat hy geskryf het. Die toneelstuk het egter nie ver gekom nie, sê hy en voeg by dit het hom laat besef dat hy sy eie werk wil publiseer. Hy wou juis die werk van jong digters in die bundel hê omdat dit vir hom belangrik is dat hulle mekaar help.“Ek glo dit is belangrik. Van die digters wil eendag hul eie bundels uitbring en dit was dus ’n goeie geleentheid om ’n voet in die deur te kry.”Armand het begin om vriende te kontak wat hy weet skryf ook, terwyl van hulle hom ook na ander digters verwys het. Lyne van Fantasie het nie ’n spesifieke tema nie, maar sê hy, al skemer die liefde dalk as hooftema deur, was die opdrag eenvoudig – julle beste werk en dit waarmee julle tevrede is.Die eindresultaat is “hoendervleisoomblikke” toe hy van die digters se werk gelees het. Ná die voltooiing van dié digbundel is Armand deur nog digters gekontak wat graag deel van ’n volgende projek wil wees en hy is vasbeslote dat Lyne van Fantasie beslis nie sy laaste bundel sal wees nie.“Ek sou dit nie sonder my medeskrywers kon doen nie. Hulle woorde vul bladsye vol blydskap, ek haal my hoed vir hulle af vir hulle werk.”Armand werk voltyds by ’n restaurant en is ook besig om sy vlieglisensie deur die Swakopmund Flying School te doen. En hoewel sy studies en sy werk meestal in Engels geskied, bly Afrikaans sy hartstaal. Vir voornemende skrywers en digters wat sê hulle is te besig om te skryf, is sy raad eenvoudig – as jy werklik wil skryf, sal jy tyd daarvoor maak. Lyne van Fantasie word op Sondag 22 Desember vanaf 17:00 tot 22:00 by die Artemis-hotel op Swakopmund vrygestel. Deel van die bekendstelling sluit ook optredes deur verskeie kunstenaars in. – henriette@republikein.com.na

Jonges se lyne van fantasie

Kommentaar

Republikein 2026-05-04

Meld asseblief aan om kommentaar te lewer

Jonges se lyne van fantasie

Kommentaar

Republikein 2026-05-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.