Jong hokkiekaptein sterf tragies

Inwoners van Mariental is diep geskok ná die tragiese dood van die 13-jarige Kondjeni Beukes, ’n belowende jong hokkiespeler wie se lewe in ’n tragiese ongeluk by die huis kortgeknip is. 

Kondjeni, ’n graad 7-leerling van Laerskool Sonop en kaptein van die skool se o.14-hokkiespan, is Sondag doodgeskok. Hy het glo aan ’n beskadigde verlengingskoord geraak terwyl hy vir die skoolweek voorberei het.

Sy tannie, Eugene Beukes, wat hom grootgemaak het en wat hy liefdevol “mammie” genoem het, het die hartverskeurende gebeure vertel. 

Volgens haar het Kondjeni haastig die verlengingskoord gaan gryp sodat sy hare gesny kon word. 

“Omdat hy klein en kort is, het hy aan die beskadigde deel gevat. Hy was toe kaalvoet en sonder ’n hemp en is doodgeskok,” het sy gesê.

In ’n pynlike terugblik het sy bygevoeg dat Kondjeni vroeër daardie dag ongewoon energiek was. 

“Hy was so gelukkig, het gedans en was vol energie. Dit was iets buite sy gewone self,” het sy gesê, haar stem wisselend tussen rou en ’n flou, bittersoet laggie.

Familielede het gesukkel om Kondjeni by die hospitaal te kry en het vertragings ervaar om vervoer te reël, omdat hul huis ver van die hoofpad af is. 

Teen die tyd dat hulle by die hospitaal aangekom het, het mediese personeel probeer om hom by te bring, maar kort daarna is hy dood verklaar. 

Tussen haar trane en giggels het sy tannie ’n seun onthou wat vol liefde en humor was. 

“Hy het kos so baie geniet en het mense altyd laat lag. Hy het geluk in ons huis ingebring,” het Eugene gesê.

Kondjeni se ma, oorweldig deur verdriet, kon nie praat nie. Sy het haarself verwyt en gewens sy was by die huis toe die voorval gebeur het. 

By Laerskool Sonop het die verlies ’n diep leemte gelaat. Sy hokkie-afrigter, Lydia Augustinus, wat hom sedert 2021 afgerig het, het hom as sowel ’n uitsonderlike atleet as ’n natuurlike leier beskryf. 

“Kort, vinnig en as ’n aanvaller onstuitbaar. Hy was die hart van die span. Sodra hy die bal gehad het, was dit byna verseker ’n doel,” het sy gesê.

Kondjeni se hokkiepad het op negejarige ouderdom begin toe hy by ’n junior-ontwikkelingsinisiatief aangesluit het wat in 2021 van stapel gestuur is. Dieselfde jaar het hy sy span as kaptein na oorwinning by die eerste streektoernooi op Mariental gelei en is hy by ’n nasionale kompetisie in Windhoek as speler van die toernooi aangewys. 

Sy talent het net bly groei. Oor die jare het hy op skoolvlak gereeld toekennings as speler van die wedstryd verwerf en nie net spanmaats nie, maar ook afrigters uit ander dorpe beïndruk – mense wat aangetrek is deur sy helder glimlag, vriendelike geaardheid en eindelose grappies.

In November 2025 het sy toewyding vrugte afgewerp toe hy vir ’n groep van 52 uit 350 spelers gekies is vir die Standard Bank o.14-elitegroep vir 2026, ’n groep wat vanjaar Namibië internasionaal sou verteenwoordig.

“Vir my was Kondjeni meer as ’n speler; hy was soos ’n seun. Ek gaan my kaptein en my kampioen mis,” het sy afrigter gesê. 

Sy familie het gesê daar is verwag dat hy vanjaar na Suid-Afrika sou reis as deel van die nasionale hokkietoerspan – ’n geleentheid wat hulle ten volle ondersteun en met trots daarna uitgesien het. 

Kondjeni, ook bekend as Koppe, word onthou as goedgemanierd, toegewyd en vol lewe. Hy laat nie net treurende geliefdes na nie, maar ook ’n gemeenskap wat deur sy gees geïnspireer is.

Hy was ’n seun wat vinnig gehardloop het, hard gelag het en met sy hele hart hokkie gespeel het.

– [email protected]