Gobabeb bring hulde aan Britse navorsers

Die Gobabeb-navorsingsentrum het ’n roerende huldeblyk aan die twee Britse slagoffers van verlede week se tragiese vliegtuigongeluk, prof. Alan Wilson (62) en Neil Oakman (63), gebring. “Dit is met swaar harte dat ons twee merkwaardige Gobabeb-medewerkers en -vriende onthou en vereer wat verlede week tragies hul lewens verloor het terwyl hulle lugwaarnemings van gemsbokke in die Namib-Sandsee gedoen het,” skryf Gobabeb op hul Facebookblad.Volgens Gobabeb was Wilson ’n veearts en professor in lokomotoriese biomeganika aan die Royal Veterinary College (RVC), Universiteit van Londen en ’n genoot van die Royal Society. “As ’n vooraanstaande akademikus was hy wêreldwyd bekend vir sy bydraes tot biomeganika en hoëprestasie-beweging in beide diere en mense.” Sy belangstelling in navorsing in die Namibwoestyn was ’n voortsetting van vorige werk in Botswana oor die beweging, jag en habitatgebruik in groot karnivore en hul prooi in Afrika.“Oakman was ’n bedrewe vlieënier en het kommersiële vlieëniers vir Ryanair in die Verenigde Koninkryk (VK) opgelei. As ’n inspekteur van die vereniging van ligtevliegtuie in die VK, het Neil aan die hoogste standaarde van veiligheid, lugwaardigheid en betroubaarheid voldoen. “Wanneer hy nie sy vliegvaardighede ten bate van wetenskap en bewaring aangebied het nie, was Neil se passie om ou vliegtuie te vlieg, insluitend die Hurricanes en Spitfires van die Tweede Wêreldoorlog,” lui die huldeblyk.Volgens Gobabeb het Wilson ’n gesamentlike navorsingsprojek tussen RVC, die ministerie van die omgewing, bosbou en toerisme en Gobabeb gelei.“Die projek het gepoog om die ingewikkelde anatomie, fisiologie en gedrag van gemsbokke in die duine beter te verstaan. Hierdie diere is uniek aangepas om te oorleef met beperkte hulpbronne in een van die wêreld se uiterste omgewings.“Die span het die gedetailleerde bewegings van vrylopende wilde diere waargeneem sonder om hulle te versteur, met behulp van ’n spesiaal aangepaste navorsingsvliegtuig vir lugopnames en data-insameling.” Saam met die Britse elektronika- en sagteware-ingenieur John Lowe het hulle nuwe wildhalsbande ontwikkel en ontplooi wat toegerus is met GPS en ingeboude sensorstelsels om nuwe insigte te bied in gemsbokke se bewegings, bewegingspatrone en gedrag, volgens Gobabeb.“Alan en Neil was nie net leiers in hul onderskeie velde nie, maar ook passievolle ontdekkingsreisigers wat diep omgegee het vir die landskappe en wildlewe waarvoor hulle so hard gewerk het om te verstaan.“Veldnavorsing in plekke soos die Namib vra vir moed, geduld en ’n blywende gevoel van verwondering – eienskappe wat hulle in oorvloed versinnebeeld het en wat ons hulle des te meer laat bewonder en waardeer het,” lui die huldeblyk verder.“Gobabeb-personeel wat die voorreg gehad het om saam met hulle te werk, sal hul warmte, hul eienaardige sin vir humor, hul nuuskierigheid, hul vrygewigheid in die deel van kennis en hul aansteeklike opgewondenheid wat met ontdekkings gepaard gegaan het, onthou.“Hul werk het saak gemaak en so ook die manier waarop hulle dit benader het – met nederigheid, vasberadenheid, respek en ’n groot sin vir pret.”Gobabeb meen met die diepgaande verlies van hierdie twee lewens, laat hulle ’n leemte agter wat nie maklik gevul kan word nie. “Ons gedagtes is by hul families, geliefdes en alle lede van die navorsings-, akademiese en lugvaartgemeenskappe wat hierdie tragedie betreur.“Gobabeb sal julle nooit vergeet nie, Alan en Neil. Ons sal julle name gereeld noem. Ons sal julle altyd in die wye, oop, blou lug van die Namib sien wat julle so liefgehad het.”Die twee Britte het Woensdagnamiddag in ’n vliegtuigongeluk naby Gobabeb in die Namib-Naukluft Nasionale Park gesterf.Volgens inligting van die Namibiese polisie in die Erongostreek het Wilson en Oakman saam met Lowe op Woensdag 25 Februarie 2026 in Namibië aangekom om navorsing by Gobabeb te doen.Oakman was agter die stange van die ligte vliegtuig met Wilson as sy passasier toe hulle verlede Woensdag omstreeks 17:00 opgestyg het om na wild met opsporingshalsbande in die omliggende duine te soek.Toe die twee nie teen die verwagte tyd teruggekeer het nie, het Lowe sy kommer uitgespreek waarna ’n soektog omstreeks 19:00 in die omgewing van stapel gestuur is.Die wrak van die Groppo-vliegtuig met die registrasiemerk G-SMLI is later naby die Gobabeb-vliegveld gevind. Wilson en Oakman is met noodlottige beserings gevind en is op die toneel dood verklaar.Ondersoeke na die oorsaak van die ongeluk duur voort.– francoise@nmh.com.na

Gobabeb bring hulde aan Britse navorsers

Kommentaar

Republikein 2026-03-26

Meld asseblief aan om kommentaar te lewer

Gobabeb bring hulde aan Britse navorsers

Kommentaar

Republikein 2026-03-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.