Geliefde dr. Silvi vereer

Henriette Lamprecht - ’n Geliefde pediater van Swakopmund wat wyd bekend is vir haar jarelange onbaatsugtige diens en groot hart en passie vir veral die jong lede van haar gemeenskap, is Saterdag tydens ’n baie spesiale gebaar vereer toe die neonatale eenheid van Mediclinic op die kusdorp na haar vernoem is. Dr. Silvia (Silvi) Möhrcken, wat erken haar beroep het háár gekies, is vereer tydens die pasafgelope jaarlikse Erongo-simposium wat op swangerskap en pasgebore babas fokus en in Swakopmund plaasgevind het. ’n Beskeie Silvia het in ’n onderhoud erken die eer was vir haar ’n groot verrassing, “omdat my werk nie oor myself gaan nie, maar oor die gemeenskap en die mense wat ek hier dien”.Sy het vertel van die “eerste dae” in haar dekades as pediater in Swakopmund toe daar na vroeggebore babas omgesien is in die voormalige Rössing Cottage-hospitaal wat nie ’n intensiewesorgeenheid vir dié doel gehad het nie.“Ons het begin met ’n klein tweeslaapkamereenheid en het nie ventilators of enige monitors gehad nie. Daar was geen spesialiste, MRI-skandeermasjiene en dokters nie. “Ons moes groot probleme hanteer en alles sonder ondersteuning doen en jy moes werklik al jou sintuie inspan en ook op jou menslike kontak staatmaak en regtig dink wat jy doen.” Maar dit was en is steeds spesiaal, al is omstandighede nou so anders, met pediatrie wat volgens haar ’n “werklik ménslike” medisyneveld is.Silvia, wat op Outjo gebore en getoë is, sê sy wou van kleins af mense help en hul pyn verlig en dit was immers haar begeerte om te dien, veral die kwesbares wat nie vir hulself kan praat nie.“Ek is hulle stem en vir my is dit ’n eer.”As pediater is sy veral passievol oor borsvoeding en voel dit moet meer bevorder en ondersteun word, veral vir ma’s wat ná die geboorte van hul kinders terugkeer werk toe. In die moderne wêreld en in veral die mediese landskap is dit belangrik dat mediese personeel nie hul menslikheid verloor nie.“Moenie jou waardigheid en jou menslike kant verloor nie, ook nie die kliniese evaluering en etiese kant nie. Dit is maklik om alles op ’n rekenaar en op tegnologie te plaas, maar gebruik die menslike faktor.” Dit beste deel van haar beroep is buiten om mense te dien, ook die liefde wat sy ontvang, sê Silvia.Sy het die vernoeming van die eenheid na haar opgedra aan almal wat oor die jare haar pad gekruis het, al haar pasiënte waaronder ’n vroeggebore baba wat ’n skrale 780 gram met geboorte geweeg het en deur haar – met die ondersteuning van verpleeg- en mediese personeel – versorg is sonder moderne tegnologie. “Ek eer al die verpleeg- en mediese personeel wat my ondersteun het, die families en gemeenskap met hierdie toekenning.” – henriette@republikein.com.na

Geliefde dr. Silvi vereer

Kommentaar

Republikein 2026-05-05

Meld asseblief aan om kommentaar te lewer

Geliefde dr. Silvi vereer

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.