Geestesgesondheid op die voorgrond

“As jy jou been breek, dan kan jy nie hardloop nie. As jou geestesgesondheid nie reg is nie, kan dit jou ook terughou.”So sê die passievolle en gedrewe Astrid O’Callaghan wat vasbeslote is om bewusmaking oor geestesgesondheid na Namibië te bring.Astrid het in Februarie 2021 van Walvisbaai na Waterford in Ierland verhuis en het onlangs deur die maatskappy waar sy tans werk, by die Elephant in the Room-veldtog betrokke geraak.Groot, versierde olifantbeelde word in maatskappy se ontvangsareas of raadsale geplaas en dit simboliseer die maatskappye se verbintenis tot korporatiewe sosiale verantwoordelikheid en hul rol as kampvegters van geestesgesondheid.“Ek het onlangs die voorreg gehad om ’n olifant genaamd Ellie in die hartjie van ’n Ierse stad te onthul. Twaalf maatskappye in Waterford het Ellie aangeneem.”Ellie se sukses in Ierland het Astrid geïnspireer en sy beplan om een van dié olifante na Namibië te bring – die eerste een in Afrika. Astrid nooi plaaslike maatskappye uit om elkeen N$5 000 te skenk en om die inisiatief af te skop het sy die eerste N$5 000 gegee. Die olifant sal dan tussen hierdie maatskappye roteer en ’n maand lank by hulle kantore uitgestal word.Die geld wat ingesamel word, sal bewustheid oor geestesgesondheid en ondersteuning in Namibiese werkplekke verhoog.“Die inisiatief verhoog nie net bewustheid nie, maar bevorder ook ’n omgewing waar werknemers bemagtig voel om hul geestesgesondheid openlik te bespreek, sonder om veroordeel of teen gediskrimineer te word,” verduidelik sy.Astrid het glo reeds belangstelling van ’n paar maatskappye in Namibië, insluitend ’n groot handelsbank en vervaardigingsmaatskappy aan die kus, wie se name nog nie bekend gemaak is nie.“Namibië het nog altyd ’n spesiale plek in my hart gehad, en selfs nadat ek vir meer as drie jaar al in Ierland bly, bly my toewyding aan my tuisland onwrikbaar.”Indien genoeg plaaslike maatskappy die inisiatief ondersteun, sal die olifantbeeld – wat sowat 1 meter hoog is – na Namibië gebring word, waarna ’n plaaslike kunstenaar die beeld sal versier.GEESTESGESONDHEID“Geestesgesondheid is vir my ’n baie groot ding en dit is belangrik in enige bedryf, want stres is een van die grootste faktore wat jou geestesgesondheid nadelig kan beïnvloed,” vertel Astrid.Sy sê verder dat dit nie daaroor gaan om jou persoonlike kwessies met jou kollegas of werkgewer te deel nie, maar eerder om ’n omgewing te skep waar mense se emosies erken word en leer om dit op ’n gesonde manier te kan uitleef.Hoewel die kollig nou op maatskappye val, meen sy dat skole ook by die veldtog kan baat. Astrid het twee jong kinders, ’n dogter en ’n seun, en vertel dat sy haar kinders in ’n omgewing grootmaak waar alle gevoelens oukei is.Sy meen dat die olifantbeelde ook by skole kan omgaan en kinders bewus maak van die belangrikheid van geestesgesondheid.“Hulle moet leer om daaroor te praat en hoe om dit te hanteer. Net soos wat jy ’n spier oefen, kan jy jou geestesgesondheid ook oefen,” sê Astrid.ELEPHANT IN THE ROOMAstrid het ook die stigter van die veldtog, Brent Pope, ontmoet en hy het ingestem om die veldtog saam met haar na Namibië te bring sodra die eerste vyf maatskappye belangstelling toon.Brent is ’n voormalige rugbyspeler, rugbytelevisie-ontleder, rugbyjoernalis, liefdadigheidswerker en spreker van Nieu-Seeland.“Ek het gesien hoe hierdie groot man opstaan en praat oor hoe hy gesukkel het met geestesgesondheidskwessies. Dit het my laat besef, hoe baie mense daar is wat te bang is om daaroor te praat,” het Astrid gesê en bygevoeg dat dit haar gemotiveer het om die inisiatief te versprei na ander plekke in die wêreld. Op die Elephant in the Room se webtuiste deel Brent baie van sy eie ervaringe en motivering agter die stigting van die veldtog.“Dit was dikwels ’n uitdagend om my moeilike verlede te deel, veral in die publieke domein. Ek het volhard, want deur my storie te vertel van ’n persoon wat met angs en depressie sukkel, het ek gehoop dat dit uiteindelik groter begrip en bewustheid vir geestesgesondheidskwessies oraloor Ierland en verder sou bring.“Ek moes dapper wees en uit my gemaksone stap sodat ander ook kon,” vertel Brent.Hoewel die veldtog in Ierland begin het, is daar reeds groot name in die internasionale korporatiewe wêreld wat by die beweging aangesluit het. – kristien@nmh-hub.com.na

Geestesgesondheid op die voorgrond

Kommentaar

Republikein 2025-11-05

Meld asseblief aan om kommentaar te lewer

Geestesgesondheid op die voorgrond

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.