Doen elke dag waarvoor jy lief is

“Al die disse word deur my gemaak en niks word in ’n bakkie gesit en gevries voor ek dit nie self geproe en goedgekeur het nie. Ek het helpers, maar hulle roer die potte of sny die groente. Ek gee elke dis die finale stempel van goedkeuring,” sê Sandri Olivier (38), lodgebestuurder en eienaar van Michelle se Kombuis Namibia. Sandri en haar identiese tweelingsuster Michelle is in die klein dorp Viljoenskroon in die Vrystaat gebore. Hulle het daar grootgeword en skoolgegaan en ná graad 12 het Sandri in Bloemfontein gebruikswetenskap studeer. Van kleins af het al vyf kinders in die kombuis gehelp en hul ouers was baie lief vir kosmaak.“Sondae het ons almal om die kospotte gestaan en vandag maak ons almal lekker kos. Ons het ook koeke gebak en verkoop om ekstra geld te maak en ek dink dit het ons van kleins af geleer hoe om entrepreneurs te wees.”“Ná my studies het ek vir familie in Namibië gaan kuier en my man leer ken. ’n Jaar later is ons getroud.”Sy en haar man bestuur die Panorama Rock Game Ranch sowat 90 kilometer oos van Windhoek. “Hy hanteer die trofeejag en ek bestuur die lodge en maak die kos.”MICHELLE SE KOMBUISIn 2019 het Michelle, wat met ’n boer in Suid-Afrika getroud is, Michelle se Kombuis begin om finansieel tot die inkomste van die gesin by te dra. “In 2022 toe die Covid-pandemie die land tref en die hele toerismebedryf tot stilstand kom, het ek my sussie gebel en gevra of ek in Namibië onder haar naam iets soortgelyks kan begin. Sy het ingestem en dis hoe Michelle se Kombuis in Namibië begin het.”Sy het met vyf geregte begin; nou is daar al amper 30 op die spyskaart. “Ons berei disse voor en dan word dit in bakkies verpak en gevries. Die gebruiker haal die bakkie uit, maak dit in die mikrogolfoond warm, maak ’n slaai of pasta by en aandete is reg om te bedien. “Daar is ’n paar geregte soos die pepper steak pie wat in die oond opgewarm met word, maar dis steeds baie maklik en eenvoudig. Alle geregte is in verskillende groottes beskikbaar – een porsie, twee porsies of vier porsies wat genoeg vir ’n gesin met twee kinders is.”Hoewel die twee kombuise in verskillende lande is, is hul spyskaarte grotendeels dieselfde. “Ek gebruik meer wildsvleis, omdat ek dit makliker kan kry en Michelle gebruik meer beesvleis, maar die disse is dieselfde. Sy het begin om tradisionele boeregeregte soos bobotie te maak, maar die aanvraag na ander disse het vinnig gegroei. Nou het ons soos stroganoff, butter chicken, chicken a la king, verskillende pasteie en hoendergeregte op die spyskaart.”Daar is ook twee groentes, soppe en drie nageregte beskikbaar.“Ek het ’n pulled pork pie gemaak, omdat ek gereken het dit sal in Namibië werk. Ons het ’n groot Duitse gemeenskap hier wat van varkvleis hou. Die hele Namibië ken pulled pork en dis by baie restaurante beskikbaar, maar in Suid-Afrika is dit volksvreemd. Michelle het dit ook nie geken nie en ek het vir haar die resep gestuur en gevra dat sy dit maak en proe. Sy het dit gedoen en nou is dit op haar spyskaart en onder haar kliënte ewe gewild as by myne.”Só werk die twee susters saam aan al hul geregte. Die een maak dit stuur die resep vir die ander een en saam word besluit of veranderings nodig is en of dit tot die spyskaart bygevoeg kan word. “Elke gereg word deeglik getoets. Dit word gemaak, gevries en dan weer opgewarm om te kyk of dit gevries kan word, hoe lank dit gevries kan word en hoe dit smaak nadat dit weer opgewarm word. Ons toets of dit aan ons standaarde voldoen voordat dit op die spyskaart kom. “Ons familie en vriende is ons proefkonyne en ons beskou alle terugvoering as positief, want dis net daardeur wat jy jou besigheid kan verbeter.”Gedurende Covid het Sandri se man vir haar ’n groot groentetuin aangelê. “Ek plant grotendeels my eie groente aan en 80 persent van al my produkte in my disse word op die plaas vervaardig. Ek verwerk die groente wat in seisoen is, soos spinasie en pampoen wat goed gevries kan word.”Michelle se Kombuis het al uitgebrei en hulle meng al die droë bestanddele vir verskillende gegeurde flapjacks. “Ons het onder meer koffie of sjokolade-gegeurde flapjacks en ons wil graag meer in dié rigting uitbrei; meer droë bestanddele meng en mense kan net eiers en water byvoeg en dit in die oond sit. “Ek maak ook tamatie- en makataankonfyt wanneer dit in seisoen is. Ek wil ook graag meer die ingelegde produkte uitbrei.”Die susters het mekaar nog altyd gehelp en ondersteun. Toe Michelle met haar besigheid begin het, het Sandri haar gehelp omdat sy gebruikswetenskap gestudeer het. Toe Sandri haar besigheid in Namibië begin het, het Michelle met haar agtergrond in bemarking weer vir Sandri gehelp. “Ons help mekaar en ons is ’n goeie span. Elkeen het haar eie besigheid, maar ons het een Facebook-blad en een naam.”TOEKENNING AgriForum Sakenetwerk het ’n Tinteltong toekenning wat besighede vereer wat dienste in Afrikaans lewer. In 2020 het Michelle die kosafdeling gewen en vanjaar was dit Sandri se beurt. “Vanjaar was die eerste keer dat besighede van buite Suid-Afrika kon deelneem. Ek het vir die koskategorie ingeskryf en saam met my was mense van die hele wêreld en toe wen ek vir Michelle se Kombuis.”AfriForum Sakenetwerk het ook vanjaar vir die eerste keer ’n kategorie vir kinderentrepreneurs buite Suid-Afrika geskep. Alle Namibiese skoliere wat ’n talent vir besigheid of ’n idee vir ’n besigheid het, kan by www.besigheidsbytjies.co.za gaan inloer en inskryf.DIE TOEKOMS“Ek wil baie graag uitbrei en my disse in baie meer winkels reg oor die land sien. Ek wil in so veel as moontlik winkels wees. “Die logistiek om pakkies individueel te maak en af te lewer, is net te veel en dit sal vir mense en vir my baie makliker wees wanneer mense eenvoudig by hul gunsteling winkel in die vrieskas kan inloer en hulle aandete kan kies. “Ek sal natuurlik nog altyd vir my ou kliënte aflewerings doen, want hulle was daar van die begin af en hulle het my besigheid gehelp groei. Hul bystand en ondersteuning in moeilike tye het Michelle se Kombuis Namibië gebring tot waar dit vandag is.” RAAD“As entrepreneur mag jy nooit moed opgee nie. Hou aan probeer en gee altyd jou beste. Maak jou produk jou eie. “Ek sou sê in die kosmaakbedryf moet ’n mens altyd een stappie voor die ander wees. Jy moet beter wees. Ek dink as jy ’n spyskaart van 20 opsies sien, sal jy dit verkies bo ’n spyskaart met net drie items. ’n Uitgebreide spyskaart gee jou ouer kliënte iets nuuts om te probeer en om na uit te sien en dis ook belangrik.” Dit wat sy doen, was nog altyd haar belangstelling; sy het in dié rigting gaan studeer en nou doen sy dit voltyds. “Ek doen wat ek voor lief is. Ek glo jy moet jou werk elke dag geniet, want anders gaan jou lewe verby en jy het dit nie geniet nie.”

Doen elke dag waarvoor jy lief is

Kommentaar

Republikein 2025-11-05

Meld asseblief aan om kommentaar te lewer

Doen elke dag waarvoor jy lief is

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.