Charene wil vroue bemagtig

Ons was mos op Gobabis wat Cattle Country en Hererowêreld is en toe my naam geroep word het hierdie pragtige vroue in hul tradisionele Hererodrag op hul voete gekom en toe kon ek my ma nie meer sien nie. 

Dít is hoe Mej. Namibië 2026, Charene Labuschagne, haar kroningsoomblik onthou. 

Toe sy en haar ma “uiteindelik weer by mekaar uitkom het ons albei gebewe soos ons mekaar gedruk het,” het sy op die NTV-program, Kletskompas, vertel. 

Charene vertel dat haar ma, Marianne Labuschagne, saam met wie sy ’n besigheid bedryf, deels die inspirasie was agter die liefdadigheidsprojek wat sy as Mej. Namibië sal behartig. Die projek, Thrive Collective, het ten doel om Namibiese vroue te bemagtig en aan te moedig om entrepreneurs te word.

“As gevolg van die feit dat ek deur entrepreneurs grootgemaak is het ek eerstehandse ervaring van hoe dit lyk om iets van die grond af op te bou en die vryheid wat dit vir ’n mens bied om jou eie besigheid te begin, maar ook die uitdaging wat dit is. 

“Veral in die stadium wat my ouers hulle besighede opgebou het, was daar nie ’n padkaart daarvoor gewees nie. Ek dink daar is nog steeds baie Namibiërs wat voel asof dit nie ’n padkaart tot daardie vryheid is nie,” sê sy. 

Thrive Collective het dus ten doel om vroue-entrepreneurs met padkaarte toe te rus wat nie net hul sakevaardighede opskerp nie, maar ook hulpbronne vir hulle bied om ’n besigheid op die been te bring. 

Charene vertel dat Thrive Collective dikwels moet terugkeer na die kernbeginsels van entrepreneurskap. 

“Ek dink baie keer kan vroue nie die moontlikhede vir entrepreneurskap in hul gemeenskappe of omgewing sien nie, so ons help” om ’n vrou te kry om die geleenthede raak te sien wat dan op die ou end ’n besigheid kan word.

Vir diegene wat paniekbevange voor enige uitdaging staan, hetsy dit entrepreneurskap is of nie, is die nuwe Mej. Namibië se raad: “Doen dit voor jy gereed is. Ek glo werklik jy groei vlerke op jou pad.”

– [email protected]