Brandweerheld word gegroet

’n Windhoekse brandweerman wat 16 jaar vir Stad Windhoek gewerk en die afgelope naweek gesterf het, is gister in ware brandweerstyl deur sy familie en kollegas gegroet.Methusalah Simataa Khama (37) was in ’n motorongeluk betrokke nadat hy en ’n kollega op pad terug was na die brandweerstasie nadat hulle uitgeroep is. Hy het ernstige beserings opgedoen en is Sondag oorlede.“Simataa se werk was om elkeen van ons en elke inwoner van Windhoek te dien. Hy het elkeen van ons en ons gesinne op een of ander manier gedien,” het sy oom, Dennis Khama, tydens die seremonie gesê.Nog ’n familielid het gesê dat hy ’n verantwoordelike mens was wat baie vir mense en sy werk omgegee het.“Hy was toegewyd daaraan om die lewe helderder te maak vir die mense vir wie hy lief was.“Dit is hoe hy onthou sal word, as ’n skouer om op te steun, ’n persoon na wie jy kon gaan in enige situasie en ’n ware vriend vir almal," het hy gesê. Khama word oorleef deur sy ouers, sy vrou en vier kinders.HULDEBLYKEDie brandweer in Windhoek het gister van hul hoofkantoor na Stad Windhoek se hoofkantoor gestap ter ere van Khama.Hulle het ook ander huldeblyke aan hom gebring wat eie aan die brandweer is. Een daarvan is ’n leer met een gebreekte trappie wat uitgestal word.“Die gebreekte trappie simboliseer die leemte wat gelaat word deur die afwesigheid van daardie individu.“Die brandweerdiens volg die beginsel van broederskap en spanwerk. Wanneer een van ons lede sterf, verteenwoordig dit ’n reuseverlies aan vaardighede en kennis,” lui ’n kennisgewing van Stad Windhoek wat die tradisie verduidelik.’n Ander huldeblyk is die rit van die plunderaar (marauder) wat die laaste rit deur die brandweerlid simboliseer.“Hulle lewe was diep verweef met die bestuur van brandweerwaens en ander reaksievoertuie. Hierdie seremoniële rit eer hul toegewyde diens, wat hul laaste reis merk, waarna hulle nie meer sal ry nie.”Die brandweer se alarm, wat gewoonlik gebruik word om almal van ’n noodgeval in te lig, word ook aangeskakel.“In hierdie geval merk dit die oorledene se laaste alarm. Die sirenes gaan vir een minuut af om die individu se diens en opoffering te herdenk.”’n Boodskap is ook oor die brandweer se tweerigtingradio uitgesaai.“Die laaste kommunikasie simboliseer die laaste poging om die lid te bereik, met geen reaksie wat verwag word, dui dit aan dat hy nie langer op radiokommunikasie sal reageer nie.”’n Swart streep is ook deur die afdeling se logo op hulle voertuie getrek. Dis ’n plegtige gebaar wat waargeneem word en dien as ’n aangrypende simbool van rou en herinnering.‘TOEGEWYDE SPANSPELER’Stad Windhoek het ook sy innige meegevoel met Khama se familie gedeel.“Hy sal met liefde onthou word as ’n toegewyde spanspeler, bekend vir sy vriendelike houding, respek en sterk werksetiek.“Simataa het ’n sagte geaardheid gehad en is dikwels met ’n glimlag waargeneem. Hy het gereeld grappies gedeel en was altyd gereed om &#039;n helpende hand te verleen,” het Stad Windhoek in sy verklaring gesê.Khama het in Maart 2008 as ’n leerlingbrandweerman (trainee) by Stad Windhoek aangesluit en is ’n jaar later bevorder tot die posisie van brandweerman. Hy het daardie posisie beklee tot sy dood.“Sy dood is ’n groot verlies vir Stad Windhoek en ons almal gaan hom mis,” lui die kennisgewing wat die kantoor van die uitvoerende hoof uitgereik het.– kristien@nmh-hub.com.na

Brandweerheld word gegroet

Kommentaar

Republikein 2026-02-04

Meld asseblief aan om kommentaar te lewer

Brandweerheld word gegroet

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.