Plaaslewe

MOGAMAT SALIE SABAN SKRYF:

Daar staan die windpomp en skreeu

Boor sy water al vir ’n eeu

Donkiekar en tweespoor gedwaal

Skewe plaashek vertel ’n verhaal.

Vroeg op met ’n sawwe lyf

Brousel warm soet om koue te verdryf

Kraal toe tussen mis en stof

Oggendson kom op baie dof.

Tussen die koppies en inni vallei

Stilte fluister wat jy nêrens kry

Kaiings en vet derm uitbraai

Mielieland staan trots gesaai.

Sterreprag en maanlig skraal

Nagvuur het sy eie verhaal

Blikbeker warm teen die bek

Tafelseën met die Bybel bedek.

Lamtyd is swoeg en sweet

Vroeg tot laat spanwerk ons weet

Groentetuin met trots gesaai

Vars uit die grond my bord verfraai.

Melk die koeie sy aan sy

Dikmelk en room afskei

Botter knie en kaas gerol

Plaaslewe eis sy eie tol.

* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.