Ontspanningshengel: Hou ons die verkeerde vis?

DR. CAROLA KIRCHNER SKRYF:Met die besige somerseisoen vir ontspanningshengel om die draai, sal hengelaars weer na Namibië se kus stroom in die hoop om ’n groot kabeljou of Weskus-steenbras te vang. Die regulasies bepaal ’n minimum lengte van 40 cm vir albei spesies. ’n Hengelaar mag per dag hoogstens twee kabeljoue langer as 70 cm en twee Weskus-steenbrasse langer as 65 cm hou, binne die algehele daaglikse saklimiet van tien visse.Maar wat wettiglik toegelaat word, is nie noodwendig die beste vir die toekoms van ons visbevolkings nie.Vir baie hengelaars is ’n reusekabeljou of -steenbras ’n trofee. Foto’s word geneem en die vis word trots huis toe gedra. Party eindig as kerrievis, ander lê maande lank in vrieskaste en word nooit geëet nie. Die ironie is dat die grootste visse nie noodwendig die lekkerste eetvisse is nie.Visbevolkings is afhanklik van suksesvolle voortplanting, om visse te vervang wat deur vangste en natuurlike sterftes verlore gaan. Maar nie alle volwasse visse dra ewe veel by nie. Groot, ouer wyfies kan baie meer eiers as jonger wyfies produseer. By sommige spesies kuit hulle ook meer dikwels, oor langer tydperke, en produseer hulle groter eiers met meer energie. Eenvoudig gestel: een groot teelwyfie kan veel meer tot die volgende geslag bydra, as wat haar grootte alleen sou laat vermoed. Wanneer sy gevang word, verloor die bevolking ook die eiers wat sy in toekomstige jare sou kon produseer. Weskus-steenbras is besonder interessant. Hulle begin hul voortplantingslewe as mannetjies, waarna sommige later in wyfies verander. Dit maak groter, ouer steenbrasse besonder waardevolle teelvisse.Elke somer onderneem volwasse silwerkabeljoue hul jaarlikse trektog om langs ons kus te kuit. Van ongeveer middel Januarie af kom groot visse in geskikte vlak baaie bymekaar om voort te plant. Hengelaars ken dit as die kabeljoutrek, oftewel die “kob run”. Wanneer soveel groot visse op een plek saamtrek, word hulle besonder aanloklike teikens. Maar dit is nie bloot visse wat verbybeweeg nie. Dit is die teelvisse wat bymekaarkom om die volgende geslag voort te bring. Die beperking op die hou van meer as twee kabeljoue langer as 70 cm is juis ingestel om hierdie groot kuitvisse te help beskerm. Een hengelaar wat ’n groot kabeljou hou, lyk dalk onbeduidend. Vermenigvuldig dit nou met honderde hengelaars gedurende die trek, en herhaal dit jaar ná jaar. Die verlies aan voortplantingsvermoë kan aansienlik wees.Dan is daar ook die persoon wat ’n groot kabeljou by ’n informele verkoper koop. Daardie koper gooi dalk nooit self ’n lyn in nie, maar sy geld moedig iemand anders aan om nóg ’n vis te vang. Om vis te koop wat vir ontspanningsdoeleindes gevang en sonder die nodige magtiging verkoop word, help om onwettige handel aan die gang te hou. Daar is egter ’n belangrike onderskeid: om vis te koop, is nie op sigself verkeerd nie. Vis kan wettiglik by die Hanganeni Artisanal Fishing Association (HAFA) gekoop word, wat georganiseerde visverkooppunte bedryf. Dit is iets anders as om ’n ontspanningshengelaar se vangs by ’n ongemagtigde verkoper te koop.Niemand stel voor dat hengelaars moet ophou visvang of dat dit verkeerd is om vis vir ’n maaltyd huis toe te neem nie. Maar dalk moet ons, met die seisoen om die draai, twee keer dink voordat ons die grootste visse hou bloot omdat ons mag. Wanneer jy weer ’n pragkabeljou of -steenbras vang, neem ’n foto en laat die vis terug see toe gaan as dit veilig vrygelaat kan word. Daardie vis kan baie meer werd wees as voortplanter van toekomstige geslagte in die see as om as kerrievis te eindig, of onder in ’n vrieskas vergeet te word.

Ontspanningshengel: Hou ons die verkeerde vis?

Kommentaar

Republikein 2026-11-11

Meld asseblief aan om kommentaar te lewer

Ontspanningshengel: Hou ons die verkeerde vis?

Kommentaar

Republikein 2026-11-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.