’n Ongeluk wat wag om te gebeur

LLEWELLYN ANTHONY SKRYF:

Ek hoop die eienaars en/of vlootbestuurder van Peterbuild Transport lees hierdie brief.

Ongeveer 20:17 op Woensdag 24 Junie 2026 was daar by die berugte spoedhobbels so amper ’n vreeslike ongeluk. Klomp voertuie staan omtrent doodstil om oor die hobbels te gaan. Toe kom daar ’n Peterbuild-trok met superlink-waens, lyk soos tautliners volspoed van agter af, verminder glad nie spoed nie. Gelukkig sien ’n ou met ’n wit Cruiser-bakkie met skape agter op die trok wat kom. Hy druk toeter en flikker ligte vir die karre voor hom. ’n Silwer Golf en nog ’n kar, hulle stuur toe heel na links, die trok kom volspoed verby oor die hobbels, so erg dat sy chevronplaat met agterligte aan die linkerkant los breek en amper op die teerpad hang! Swaai toe regs om die volgende karre te mis en hou daai spoed oor al die stelle hobbels! Die ergste, net agter hom, nog ’n identiese trok van Peterbuilt, selfde kleure ook en jaag ook volspoed oor alles! Ek ry toe verby hulle en gaan stop waar hulle moet links vurk om weegbrug toe te gaan soos die wet vereis, sodat ek hulle kan konfronteer en foto’s van registrasienommers, trokke en drywers neem, maar hulle ignoreer die glipweg en hou volspoed reguit aan onder die brug deur!

Dit kon ’n erge ongeluk gewees het, met die insittendes van die karre wat vermorsel sou wees! Die betrokkenes kan my enige tyd kontak vir meer besonderhede!