'n Nuwe begin

Theresa van Zyl

Met my laaste woorde aan jou vir 2023, het ek afgesluit met die gedagte dat ons weer verder ons droom kan najaag met die begin van die nuwe jaar en dat daar vir alles ‘n tyd en ‘n rede is, want God laat alles ten goede meewerk vir dié wat hom liefhet en wat volgens Sy besluit geroep is. . .

En nou het ons reeds 2024 binnegestap. Geluk!

Jy en ek het die voorreg om nog ‘n nuwe jaar te kan aandurf. Kraakvars dagboeke, maandbeplanners wat wink met uitnodigende spasies, lessenaarkalenders wat ooplê by Januarie 2024. . . ‘n Nuwe Begin!

Dis wat ons nodig het – om oor te begin en nuut te begin. Die belofte van ‘n nuwe begin blaas weer die vuur van hoop en drome aan en die wonder is dat dit daar is, elke dag en elke oomblik. Maar, elke nuwe begin kom met ‘n voorwaarde. Ja, jy het reg gelees.

Om nuut te begin, gebeur nie vanself nie. Jy moet ‘n keuse maak – bewustelik besluit om nuut te begin. En om dít te kan doen, moet jy die oue laat gaan – ook elke gevoel binne jou dat jy in iets gefaal het, of dat jy misluk het in ‘n vorige poging. Begin nuut in die ware sin van die woord sonder skuldgevoelens oor mislukkings of foute. Dis verby. Nou is nou. Vat die nuwe begin wat God aan jou gee vas met jou hart en met jou siel, met jou gedagtes en jou elke dag.

Beloftes van ‘n nuwe begin is volop in God se Liefdesbrief aan ons, maar dit hang van jou en my af om dit ‘n tasbare werklikheid te maak in ons lewe. Ek is seker jy weet hoe dit voel wanneer jy glo dat God van jou vra om iets te doen - en al stem jy daarmee saam en jy begin vol ywer daaraan werk. . . misluk jy iewers langs die pad, of jy raak agter met jou beplanning en jy voel oorweldig deur die agterstand. Dan voel jy dat jy jouself en jou God gefaal het en teleurstelling verdof jou entoesiasme.

Dit laat jou en my met nét twee keuses: Jy voel skuldig daaroor dat jy misluk het, jy laat toe dat dit jou lamlê, jou verwagtinge versmoor, jou energie steel en jy stagneer, gee moed op en hou net op probeer – óf jy begin wéér. Kies om weer te begin, want daardeur kies jy oorwinning oor jouself en alles wat probeer in die pad staan van jou droom, van God se Plan vir jou.

Maak nie saak in watter area van jou lewe jy ‘n nuwe begin nodig het nie, dis daar – wagtend vir jou, soos die Here wat gereed is om jou te help om oor te begin met jou Nuwe Begin! Dit is nie te laat om van nuuts af saam met God te begin nie. Nog nie, want daar is steeds lewensasem binne jou.

Wanneer God ‘n begeerte in jou hart plaas om ‘n spesifieke doel te bereik, kan jy ook die selfvertroue hê dat Hy jou die krag en die vermoё sal gee om dit te bereik.

Hoe bereik jy daardie doel, daardie plan, daardie droom van jou?

Een dag, een uur en een minuut op ‘n slag. En moenie uitstel nie. Moenie wag vir Vrydag of Maandag, volgende week of volgende maand nie. Begin nóú - al is dit hoe klein in jou oё. En kom ons fokus hierdie jaar op vordering, nie op perfeksie nie.

Ek nooi jou om in 2024 saam met my te gaan op ‘n soeke, soos die Engelse sê – ‘n “quest” na God se Plan vir jou en my lewe, asook met alles ín ons lewe. Sy Plan sprankel deur die Skrif soos verligte voetpaaie na die waarheid. Kom, dan ontdek ons dit saam . . . Een dag op ‘n slag van ons nuwe begin!

Is jy reg? Daarsy, dis hoe dit moet wees.

Haal asem en . . .

Begin nóú met Jou Nuwe Begin! - gasskrywer