Leierskap vir leke – ’n Druppel in die see
“As ’n man word jy nie deur jou opvoeding, sosiale status of rykdom gedefinieer nie, maar deur jou karakter, integriteit en jou vermoë om die regte ding te doen.” – Welcome Witbooi, hervormde bendelid, filantroop en motiveringspreker
Daar is ’n spesiale groep leiers wat dikwels oorgesien word. Hulle navolgers stap in tiene eerder as honderde; en hul impak word in individue gemeet, nie skares nie. Vele sou hulle nie eens as leiers ag nie, want hul rol teenoor dié van sakebestuurders of politici is onvergelykbaar. Van titels of formele outoriteit is daar nie juis sprake nie en van vergoeding vir hul werk, nog minder. Tog is hulle ’n groep mense wat die beste in ander uitbring en hul gemeenskappe tot hoër hoogtes dryf. Hulle is die spiere wat gemeenskappe bou, probleme aanspreek en grondvlak-welsyn bevorder. Hulle is druppels in die see van leierskap en tog ook die sout van die aarde.
Gemeenskapsleiers is die geseënde individue wat ’n verskil aan hul naaste bring. Dis hulle wat lei, inspireer en mobiliseer om hul onmiddellike gemeenskap tot gesamentlike optrede aan te spoor. Hulle invloed is informeel en hulle gebruik gedeelde doelwitte om samewerking te bewerkstellig. Dis mense soos die pastoor by ’n kerk, die grondvlak-organiseerders wat dinge in die gemeenskap laat gebeur, die een wat voorspraak doen vir plaaslike kwessies, of dié wat jeugdiges bemagtig.
Gemeenskapsleiers se krag en impak is gegrond in hul verhoudings met ander, hul plaaslike netwerk, wederkerige vertroue en samewerking. Hul motivering is geanker in ’n belang om gemeenskappe op te hef en hul lewensgehalte te verbeter, eerder as persoonlike gewin. Daar is nie noodwendig ’n formele rol aan hulle toegeken nie, maar hul leierskap is organies gebore uit die gemeenskap se behoeftes, tradisies en waardes. Gemeenskapsleiers is doeltreffend omdat hulle inklusiwiteit te midde van ingewikkelde sosiale dinamika bevorder. Begunstigdes van dié leiers bou hul vaardighede, selfvertroue en netwerke wat tot langtermynverandering lei.
Dit herinner aan die verhaal van Welcome Witbooi, ’n Suid-Afrikaner wat van 12-jarige ouderdom reeds ’n bendelid was. Dit was in die Pollsmoor-tronk, toe hy ’n vonnis vir motorkaping uitgedien het, waar Welcome besef het die bendelewe sou nie vir hom ’n toekoms bied nie. Maar om summier van ’n bende weg te stap, is nie vir ’n lafhartige nie. Welcome het wel die bomenslike wilskrag bymekaargeskraap om dit reg te kry – met die hulp van die gevangenis se kapelaan. En terwyl Welcome se storie in die publiek bekend is en hy vele volgelinge inspireer, sou niemand juis twee maal oor die naam van die kapelaan wonder nie. Die kapelaan is Vader Babychan Arackathara – ’n voorbeeld van hoe één gemeenskapsleier die verskil in ’n enkele persoon se ondergang of sukses was. Danksy Vader Arackathara se ondersteuning in die tronk, het Welcome vandag ’n liefdadigheidsorganisasie wat ander jongmense help om die beste in hul lewens te bereik. Een gemeenskapsleier – een geïnspireerde persoon – honderde lewens wat geraak word.
Wat beteken dit vir jou? Weet dat jý die krag het om verandering te bring. Jou pogings mag onsigbaar voel, maar jou impak is soos dié van ’n tsoenami. En al sê hulle dit nou nie, eendag gaan iemand terugkyk en jóú ewig dankbaar wees. * Annemarie Schullenbach is ’n navorsings-, besigheids- en bemarkingskonsultant met ’n meestersgraad in besigheidsleierskap en veranderingsbestuur van die Namibië Universiteit vir Wetenskap en Tegnologie. Sy het meer as 20 jaar se professionele ondervinding in die private en openbare sektor, in leierskap, strategie en navorsingsbepaalde belangstellingsvelde.– [email protected]* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.
Daar is ’n spesiale groep leiers wat dikwels oorgesien word. Hulle navolgers stap in tiene eerder as honderde; en hul impak word in individue gemeet, nie skares nie. Vele sou hulle nie eens as leiers ag nie, want hul rol teenoor dié van sakebestuurders of politici is onvergelykbaar. Van titels of formele outoriteit is daar nie juis sprake nie en van vergoeding vir hul werk, nog minder. Tog is hulle ’n groep mense wat die beste in ander uitbring en hul gemeenskappe tot hoër hoogtes dryf. Hulle is die spiere wat gemeenskappe bou, probleme aanspreek en grondvlak-welsyn bevorder. Hulle is druppels in die see van leierskap en tog ook die sout van die aarde.
Gemeenskapsleiers is die geseënde individue wat ’n verskil aan hul naaste bring. Dis hulle wat lei, inspireer en mobiliseer om hul onmiddellike gemeenskap tot gesamentlike optrede aan te spoor. Hulle invloed is informeel en hulle gebruik gedeelde doelwitte om samewerking te bewerkstellig. Dis mense soos die pastoor by ’n kerk, die grondvlak-organiseerders wat dinge in die gemeenskap laat gebeur, die een wat voorspraak doen vir plaaslike kwessies, of dié wat jeugdiges bemagtig.
Gemeenskapsleiers se krag en impak is gegrond in hul verhoudings met ander, hul plaaslike netwerk, wederkerige vertroue en samewerking. Hul motivering is geanker in ’n belang om gemeenskappe op te hef en hul lewensgehalte te verbeter, eerder as persoonlike gewin. Daar is nie noodwendig ’n formele rol aan hulle toegeken nie, maar hul leierskap is organies gebore uit die gemeenskap se behoeftes, tradisies en waardes. Gemeenskapsleiers is doeltreffend omdat hulle inklusiwiteit te midde van ingewikkelde sosiale dinamika bevorder. Begunstigdes van dié leiers bou hul vaardighede, selfvertroue en netwerke wat tot langtermynverandering lei.
Dit herinner aan die verhaal van Welcome Witbooi, ’n Suid-Afrikaner wat van 12-jarige ouderdom reeds ’n bendelid was. Dit was in die Pollsmoor-tronk, toe hy ’n vonnis vir motorkaping uitgedien het, waar Welcome besef het die bendelewe sou nie vir hom ’n toekoms bied nie. Maar om summier van ’n bende weg te stap, is nie vir ’n lafhartige nie. Welcome het wel die bomenslike wilskrag bymekaargeskraap om dit reg te kry – met die hulp van die gevangenis se kapelaan. En terwyl Welcome se storie in die publiek bekend is en hy vele volgelinge inspireer, sou niemand juis twee maal oor die naam van die kapelaan wonder nie. Die kapelaan is Vader Babychan Arackathara – ’n voorbeeld van hoe één gemeenskapsleier die verskil in ’n enkele persoon se ondergang of sukses was. Danksy Vader Arackathara se ondersteuning in die tronk, het Welcome vandag ’n liefdadigheidsorganisasie wat ander jongmense help om die beste in hul lewens te bereik. Een gemeenskapsleier – een geïnspireerde persoon – honderde lewens wat geraak word.
Wat beteken dit vir jou? Weet dat jý die krag het om verandering te bring. Jou pogings mag onsigbaar voel, maar jou impak is soos dié van ’n tsoenami. En al sê hulle dit nou nie, eendag gaan iemand terugkyk en jóú ewig dankbaar wees. * Annemarie Schullenbach is ’n navorsings-, besigheids- en bemarkingskonsultant met ’n meestersgraad in besigheidsleierskap en veranderingsbestuur van die Namibië Universiteit vir Wetenskap en Tegnologie. Sy het meer as 20 jaar se professionele ondervinding in die private en openbare sektor, in leierskap, strategie en navorsingsbepaalde belangstellingsvelde.– [email protected]* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.
Kommentaar
Republikein
Geen kommentaar is op hierdie artikel gelaat nie