Jy het tot siens vir my gesê

CHARMY SKRYF:

Op ’n koel oggend, waar almal nog slaap, het jy alleen met jou gedagtes gestap, op die wye teerpad van Vredenburg. Rustig.

Jy hoor die mossies in die verte, die eerste asem van vars lug. Die mooi natuur wat God geskape het. Jy stap, besef nie hoe lank jy al op die pad is nie, maak ook nie saak nie, want jy gaan na jou roeping.

God het jou geroep. Hy het gesê “tot hier toe en nie verder nie. Kom na my toe almal wat seer en gebroke is, Ek sal julle genesing gee”.

Jy stap. Duisende gedagtes maal deur jou kop. Jy besef jy is dors, maar nie ’n tipe dors wat jy kan les nie. Jy stap. Jou plan oor en oor deur jou kop gemaal. God het my geroep, ek sal vrede kry. My tyd is naby.

Dan sien jy die windmeule en besef onmiddellik: Hier is my bestemming. Jy voel die verligting deur jou liggaam spoel, jy begin besef jy kry vrede, jy besef jy is nie meer dors nie, nie meer honger nie, nie meer moeg nie.

Die son het sy deurbraak gemaak. Die wêreld is besig om wakker te raak, die voëltjies roep opgewonde, maar jy gaan nou slaap. Die slaap waarna jy gesmag het vir dae, weke, jare.

Jou hart is besig om vinniger te klop, want God is naby. Jy ontmoet vandag jou Skepper. Jy sien die lig, maar nie die sonlig nie, jy sien weer die mooi, want alhoewel jy God se hand gelos het, sien jy Sy hand.

Hy roep: “Kom Jade.”

Niks maak meer saak nie, die wêreld is besig om te verdwyn soos jy elke tree nader na jou Skepper betree. Die onbeskryfbare gevoel van liefde, van vrede oorweldig jou, want jy besef, dis nou jou tyd.

Die mooiste prentjie vorm voor jou. Niks en niemand maak meer saak op daai oomblik nie, jy het jou doel bereik. Jy draai nog vir ’n laaste keer om en sien dat daar twee rye spore is, Hy het nog al die tyd saam met jou gestap. Jy gaan nou slaap en nooit weer opstaan nie, Hy gaan jou ewige rus gee, en jy besef op daai oomblik, Jou God is ’n werklikheid.

Jy maak jou oë toe, en alles speel voor jou af, maar op die einde wag Hy vir jou, Hy het jou nog nooit verlaat nie.

Ek weet Jy is nou by Hom.

Rus sag Jade, jy het tot siens gesê.

* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.