Jou warmte teen die bibberkoue

Dit raak nou koud.

Die koue gaan gepaard met baie dinge, maar ek wil bietjie praat oor die impak wat die winter op ons geestesgesondheid het.

Wintertye word Namibiërs deur die bleek wêreld om ons gekonfronteer, die plante en gras wat doodgaan, die kort en soms bewolkte dae en die wind wat sommige aande looi.

Dit raak al hoe moeiliker om in die oggende op te staan.

Eerstens herinner ek almal dat dit net ’n seisoen is; dit gaan ook verby. Ons sal deur die winter kom, maar dit hang van jou uitkyk af of dit ’n maklike of moeilike proses gaan wees.

Jou uitkyk op die lewe is een van die min dinge wat jy redelik eenvoudig kan verander en verbeter. Let wel, eenvoudig is nie noodwendig maklik nie.

Jou moet jou uitkyk positief hou. Dit verg dat jy jou uitkyk doelbewus moet aanpas. Die beste is as dit reeds ’n gewoonte by jou is om die mooi in die lewe raak te sien. Neem kennis daarvan. Neem ’n oomblik om dit te waardeer. Besef dat daar nog talle mooi in die lewe is. Geniet dit.

Met hierdie positiewe uitkyk loop jy die dag tegemoet. Gedurende die dag sal jou uitkyk dalk belemmer word, maar moet nie bekommerd wees nie, dit is hoe die lewe werk.

Sien dit. Erken dit. Neem ’n besluit wat jy daarmee gaan doen. Doen dit. Maak vrede en vergeet daarvan. Beweeg aan met jou dag, en kyk weer uit vir iets wat jou uitkyk sal verbeter.

Jy moet die koue hokslaan. Jy moet nie toelaat dat dit jou hart en jou siel laat vries nie. Vertroetel jouself en wees lief vir jouself. Dis makliker om vir ander om te gee as vir jouself. Dis ook makliker om ander te vergewe as vir jouself.

Kyk na jou omstandighede en bepaal hoekom jy so is. Verstaan jouself. Maak ’n besluit wat jy aan jouself aanvaar, en wat jy wil verander. Doen dit dan.

Jy sal vinnig agterkom dit is nie so maklik om jouself te verander nie. Soms is dit jou eie skuld en soms is dit weens omstandighede, maar die redes is altyd duideliker vir jouself as vir iemand anders.

So leer ons ook dat ander mense se lewens dikwels meer duister is as wat ons besef. Ons moet mense toelaat om hulself te wees sonder om te oordeel. Oordeel liewer jouself en jou omstandighede. Die besluite wat jy oor jouself geneem het, is ook meer uitvoerbaar. Om ander te oordeel, help nie veel nie.

My boodskap wat ek probeer oordra, is dat jy die sonskyn in hierdie donker dae moet wees. Jou glimlag is nou van uiterste belang. Jou hallo, jou drukkie, jou aandag, jou moeite en jou tyd wat jy aan jou medemens bestee, is nou so veel meer werd. Dit maak ’n verskil. Jy maak ’n verskil.

– [email protected]