Hosea Kutako se opgradering

ANONIEM SKRYF:Die aanvanklike goedkeuring van N$245 miljoen vir die opgradering van die Internasionale Lughawe Hosea Kutako blyk asof dit nie sy doel bereik het nie. Vingers word daagliks gewys na Paramount, wat glo nie die mas opkom nie, maar is dit die rede? Baie gou en duidelik kan gesien word die rye word veroorsaak deur die skandeermasjien waardeur die uitgaande passasiers se tasse gevoer word. Volgens die oorspronklike aankondiging deur dr. Leake Hangala, was dit deel van die opgraderingsprojek. Dit blyk egter asof dit vergete geraak het in die beplanning en toe slegs voor die uitgangsdeure “gedrop” is. Die gevolg is, jy ontvang jou tasse en gaan wag in ’n ry vir ’n uur of twee (afhangend hoeveel vliegtuie geland het) vir die tasse se skandering. Nog erger is dat die masjien nie op ’n werkbare hoogte geïnstalleer is nie, en almal moet hul tasse van die grond af opvis waar die masjien die tasse op ’n hoop uitspoeg. Selfs nog erger is die operateur wat op ’n klein eksamentafeltjie sit en die ry stop en jou stroom-op na die deursoek-area verwys, indien hy iets snaaks in jou tas bespeur. Ruimte bestaan nie om die masjien nie en veroorsaak ’n gemaal en gewag tot jou tasse op jou trollie is en jy stamp-stamp kan uitgaan. Ek voel skaam dat dit die eerste verwelkoming is wat toeriste in Namibië moet ervaar. Ek voel skaam dat die projek agter ons Namibiese konsultante se naam staan. Ek voel skaam dat soveel geld bewillig word vir noodsaaklike verbeteringe en nie die doel bereik nie. Is daar dalk ’n “tweede fase” in die pyplyn waar die foute herstel gaan word?* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Hosea Kutako se opgradering

Kommentaar

Republikein 2026-02-03

Meld asseblief aan om kommentaar te lewer

Hosea Kutako se opgradering

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.