BYBELSE WYSHEID

DR. ANNES NEL

Jesaja 1:18: Kom tog, laat ons die saak met mekaar uitmaak, sê die Here.

Adrianus van Selms het opgemerk dat ’n lewe sonder aanbidding en etiek onmenslik is. Verder is ’n lewe met aanbidding en sonder etiek skynheiligheid. ’n Lewe met etiek en sonder aanbidding kort diepte. God se liefdevolle opdrag is aanbidding en ’n gesonde moraliteit.

Jesaja het die mense uitgedaag omdat hulle aanbidding en liefde vir mense geskei het. Die verwaarlosing van geregtigheid te midde van al hulle godsdiens was vir God onaanvaarbaar. Hulle lei ’n dubbele lewe. Hulle bring offers en aanbid terwyl hulle hulle medemens dwarsdeur die week mishandel.

Hy roep hulle tot bekering. Dit is die enigste manier om die oordeel van die Here te ontvlug. Bekering behels meer as net om deur gebed en aanbidding na God terug te keer. Die noodsaaklike komponente van bekering in hierdie gedeelte is om die weerloses te beskerm en toewyding aan reg en geregtigheid. Ware bekering beteken om te leer om goed te doen.

Ons moet weer verstaan dat God nooit kompromieë aangaan oor wat vir Hom belangrik is nie. Geregtigheid en deernis met ander is nie opsioneel nie. Ons kan godsdienstig en vroom wees, maar ware vroomheid hou aanbidding en moraliteit bymekaar. Andersins is ons net skynheilig. Ons samelewing het mense nodig wat verstaan dat ware aanbidding op Sondae en elke weeksdag gedoen word, by die werk, in ons gesinne en tussen die mense waar ons onsself bevind.

Vader, laat ek U en ander met liefde dien, in Jesus se Naam. Amen.