Agterstallige boete

ANONIEM SKRYF: 

Ek word op ’n Donderdagmiddag geskakel in verband met ’n verkeerskamera-oortreding wat in Maart 2025 begaan is. Alle daaropvolgende e-posse vanaf die betrokke owerhede is deur my geïgnoreer vir ’n jaar lank en ek moet die Vrydag in die hof verskyn na my arrestasie Donderdagmiddag en ’n nag in die selle, aldus Inspekteur Rooi op die eerste vloer, kamer 5 van die hoofpolisiestasie. Vir verdere aandag skakel hy my oor na sy hoof, Kommissaris De Lange, wat my inlig dat aangesien ons die spertyd van Woensdag misgeloop het, sake nou slegs beredder kan word deur die betalingsbewys aan die konstitusionele board by Inspekteur Rooi in te handig en verskaf ook sy telefoonnommer 085 807 7031 vir verdere kontak.

Indien dit nie voor 15:00 geskied nie, sal ek terstond gearresteer moet word en en Inspekteur Rooi vertrek glo binnekort om my en twee ander oortreders te kom sien in verband met die betaling. Ek het hom ingelig dat ek net eers “iemand” anders gaan sien vir advies en nodeloos om te berig het 15:00 gekom en gegaan sonder dat die deputasie opgedaag het en ek met my daaglikse roetine kon aangaan, nadat ek eers by ’n dooie foon uitgekom het toe ek Kommissaris De Lange probeer skakel het. Dieselfde was die geval met drie nommers by Nampol.

Wonder net of MTC die nommer kan opspoor. Intussen moet elke motoris maar seker maak dat daar geen onbetaalde boetes teen hom of haar is nie.